Appel, Carl. Poésies provençales inédites tirées des manuscrits d’Italie (Suite). "Revue des langues romanes", 39 (1896), pp. 177-216

Code: 349,006 Auteur: Peire Milo Genre: Canso Numero: [VII]

Pois qe dal cor m'aven, farai chanzos

I	1	Pois qe dal cor m'aven, farai chanzos,
		e pois q'eu vei spandre flor de novel
		e pois q'eu vei alegrar li auzel
		qi van chantan sus l'arbre q'e follios;
	5	e pois q'eu vei l'un del autre·s iauzir,
		ben puesc aver pensament e consir,
		car anc un iorn no fui ioios d'amar,
		ni ia per mal d'amor no·n posc estrar.
II		Domna, en vos trobei tals guierdos
	10	com fa al lop lo chabrols e l'agnel,
		qant enver lui ill corren senz revel
		e laissam star las fedas e·ls moutos;
		aissi, domna, al prim, al mieu albir,
		per la meillor eu vos cudai chauzir,
	15	mas iogador ai vist soven iogar
		qe get'a fal'e si cuia entrar.
III		Hai, madona, ·l vostre cors orgoillos
		tola d'aissi l'ira e·l capdel,
		e fassa mi, si·us plaz, un semblan bel,
	20	e ia poissas non serai tan iros.
		meravill me, car am tant ni dezir,
		qe per merces no vol un prec auzir,
		e ia ac merces lo segner Deus d'un lar
		qi en la crois li saup merce clamar.
III	25	Las! qe farai? morrai tan cossiros?
		oc, q'eu non puesc de leis aver apel,
		e com li soi cascun iorn plus fizel,
		eu mais la trop vas mi plus airos;
		e cant la veg encontra mi venir,
	30	eu vauc vas leis tan ioios per servir,
		donc se capten escura del iogar;
		mas ia vi far apres scur temps ben clar.
IV		Ara soi eu en carcer tenebros,
		sa par no vi en borg ni en castel,
	35	qe eu non puesc trobar clau ni martel
		qo·m puesca trar de leis mans del leos
		e pois merces, q'era claus del ubrir,
		eu non la trop, soi vencutz, sens mentir
		ni ia per zo no·m recreirai d'amar,
	40	q'ieu vi ia hom q'era vencutz, sobrar.
V		Ai, mala res, Dieus vos lais repentir
		del mal qe·m faitz, don m'aves fait soffrir,
		c'aissi com pert tot'aiga douz'e mar
		son nom, si·l pert en vos amors, so·n par.