Appel, Carl. Poésies provençales inédites tirées des manuscrits d’Italie (Suite). "Revue des langues romanes", 39 (1896), pp. 177-216

Code: 349,007 Auteur: Peire Milo Genre: Canso Numero: [VIII]

Quant on troba dos bos combatedor

I	1	Quant on troba dos bos combatedor
		d'engal proeza e d'engal garnimen
		e l'uns non pot plus de l'autre nien,
		donc me sembla qe·l iocs fora maior;
	5	e s'il son dos sobra a un, so·m par,
		qi se combat qant q'el pot, pois merces
		s'el lor clama, da blasmar non es ges;
		no·m meravil se·l sol non pot durar.
II		E pois qe·l dos q'es del venzer segnor
	10	non an del sol merces ni chauzimen,
		adonc s'en fan blasmar de tota gen
		e lor afar torna a deshenor.
		e s'un autre vol lo sol aiudar
		e venqesson pois los dos, semblant m'es
	15	qe tota gentz iutiera: granz bes es,
		e da chascun il se feiran lauzar.
III		A vos, merces, complaing eu ma dolor,
		qe no m’en pot aiudar om viven,
		q'ieu soi lo sols qi·s combat escien
	20	encontra dos: ma domna et amor,
		e ia no·m val merces tot iorn clamar.
		or m'aiudatz, si vos platz, gentils res,
		qe chascuns hom vos grazira los bes,
		pos qe no·m val ni ben dir ni ben far.
IV	25	E s'ieu pogμes, en fugira aillor;
		mas l'us dels dos m'enchauza, e·m repren,
		qe cor plus tost c'auzel qi va volen;
		estier mon grat mi fa tornar va lor,
		e s'a merces plagues de secors dar,
	30	non o pot far, se il tot o volgues,
		qe ma donna no·l vol, qe m'a conqes,
		anz vol q'eu moir 'e·n lais desesperar.
V		Ara posc eu tornar mon chant en plor,
		pois q'eu non puesc fugir, qe l'unz mi pren;
	35	e pois non puesc durar, plus no·m defen.
		pois de secors non posc aver valor,
		las, qe farai? no·m sai acoisselar,
		se l'us dels dos non sta vas mi cortes;
		pois qe sos hom mi rent liges e pres,
	40	sol del pechat qal qe be·m degra far.
VI		Ben es malvatz qi·s laissa perillar
		alcun caitiu, s'aiudar li pogues,
		pois q'envas lei ia non es mas repres
		mas sol d'aitan: de servir e d'onrar.
VII	45	Ai, ma donna, si vas vos mi valgues
		plor ni sospir ni maltrag q'eu agues,
		ia per nul temps ioi non cug demandar.