Appel, Carl. Poésies provençales inédites tirées des manuscrits d’Italie (Suite). "Revue des langues romanes", 39 (1896), pp. 177-216

Code: 349,009 Auteur: Peire Milo Genre: Canso Numero: [IX]

Si com lo mege fa crer

I	1	Si com lo mege fa crer
		al malaut que crid' e brai.
		qan li dis: «tu scanperai»
		e del morir sap per ver,
	5	e pero si·l relenqis
		inanz q'il morz sia,
		ni no i va tan con solia,
		qan s'aprosma de la fis.
II		Aisi midon me promis
	10	e·m dis qe gaudenz serai
		del mal trag qe suferz ai,
		don tornei mon plor en ris,
		q'eu cuiava mon plaxer
		aver sens bauxia;
	15	ara veg qu'il non sufria
		del seu bels oils mi veçer.
III		E pero no·m desesper
		ni ça no·m desperarai
		ni desesperaz serai,
	20	anz ferm en lei mon esper,
		que per bon espar enrequis
		paubr'om manta via,
		per desesper non ac mia
		Iudas trager paradis.
IV	25	Deus! per que ai mon cor mis
		la dond ia non iausirai,
		pois que sa promess' estrai
		e l non son oc contradis?
		pero·s dobla mei doler
	30	e creis noitz e dia;
		ma ço·n sçembla gram fallia:
		en prometre non-voler.
V		E per ço en non çaler
		metrai el desir qu'eu n'ai.
	35	fols! que ai dig? non farai,
		que no·l vol çel qi'n poder
		m'a, per qu'eu m'afortis
		en sa conpagnia,
		que s'amor tan fort mi lia
	40	que del tot il m'a conqis.
VI		Eu sui cel qui no·m gechis
		per respeig, anz atendrai
		ni ça no m'en recrerai,
		anz serai de tot aclis,
	45	qu'el mond non es nuls aver
		qi·m des manentia,
		per qu'eu mais en sa bailia
		voil esser matin e ser.
VII		Cançon, Deu mi lais veçer
	50	que tu dreiça via
		anz a midon sens fallia
		far lo meu maltrag saber.