De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Code: 366,028 Auteur: Peirol Genre: Sirventes Numero: LXXIV

Pus flum Jordan ai vist el Monumen

I	1	Pus flum Jordan ai vist el Monumen,
		A vos, vers Dieus, qu’es senher dels senhors,
		Ne ren merce, quar vos plac tan d’onors
		Quel sancte loc on nasques veramen
	5	M’avetz mostrat; don ai mon cor jauzen;
		Quar, s’ieu era en Proensa, d’un an
		Nom clamarian Sarrazi «Johan».
II		Arans don Dieus bona mar e bon ven
		E bona nau e bos governadors,
	10	Qu’a Marcelha m’en vuelh tornar de cors;
		Qu’ar, s’ieu era de lai mar veramen,
		Acre e Sur e Tripol el sirven
		E l’Espital el Templ’el rey Johan
		Coman a Dieu, e l’aigua de Rotlan.
III	15	Qu’Englaterra a croy emendamen
		Del rey Richart; e Fransa ab sas flors
		Soli’aver bon rey e bos senhors;
		E Espanha un autre rey valen;
		E Monferrat bo marques eyssamen;
	20	E l’Emperi emperador prezan:
		Aquestz que y son no sai quos captenran.
IV		Belh Senher Dieus, si feyssetz a mon sen,
		Ben guardaratz qui faitz emperadors,
		Ni qui faitz reys, ni datz castels ni tors,
	25	Quar, pus son rics, vos tenon a nien ;
		Qu’ieu vi antan faire man sagramen
		L’Emperador, don ar s’en vai camjan,
		Quo fes lo Guasc que traisses de l’afan.
V		Emperador, Damiataus aten
	30	E nueg e jorn plora la blanca tors
		Per vostr’aigla qu’en gitet us voutors:
		Volpilla es aigla que voutors pren!
		Anta y avetz el Soudan onramen,
		E, part l’anta, avetz hi tug tal dan
	35	Que nostra ley s’en vai trop rezeguan.