De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Code: 010,044 Auteur: Aimeric de Peguilhan Genre: Gap Numero: CVIII

Anc quem fezes vers ni canzo

I	1	Anc quem fezes vers ni canzo,
		Eras voill far motz senes so,
		Qu’una domnam troba ocaizo
		On sui esbaitz e torbatz:
	5	Qu’elham pregua em diz, castian,
		Quem lais de domnei e de chan,
		Que trop sui vellz ad ops d’aman;
		Mas, s’ages subtilmen cercatz,
II		Mos aibs, no crei que m’o dixes;
	10	Qu’a tot lo meinz lo cor i es,
		E sai conoisser mals e bes,
		E saviezas e foldatz.
		E sai grazir e mercejar
		Quim fai honor ni benestar,
	15	E be per be guiderdonar,
		E mal per mal, sim soi forzatz.
III		Enqueras ai autre saber:
		C’als bos me sai far car tener,
		Et als crois doptar e temer;
	20	Tan son soptils e veziatz.
		E posc annar ben e venir,
		E afan e sojorn sofrir,
		E, als obs, caud e freid sentir;
		Tant soi del tot ben afeitatz.
IV	25	E sai, entrels plus conoissens,
		Solazar ab motz avinenz;
		Mas non ges a totz egalmenz,
		Que bon’es mesura en solatz.
		Et a bonas domnas sai be
	30	Parlar e dir zo ques cove;
		E, quan dic ni respon, gar me
		De dir so don sia encolpatz.
V		E, se gran guerra sors ni creis,
		Puosc m’armar sol per mi mezeis
	35	Del tot que no i mermi coreis;
		Pos mont a caval totz armatz.
		E, quan soi montatz en destrier,
		Poing lo dels esperos el fer
		Tan quel faz valent e corser;
	40	E, quant es bes amaestratz
VI		Et eu son armatz tot de sus,
		Nom par qu’Ectors ni Tideus
		Fazes doas jostas negus
		Plus tost en un besoign, qu’eu fatz;
	45	Qu’ieu ai pertusatz manz escutz
		Ab ma lanza, per meig fendutz,
		E n’abat e son abatutz;
		E, quan cas, son tost relevatz.
VII		E no crezatz que trop sojorn
	50	Qu’en la batailla ades no torn,
		E josti meill a l’autre jorn
		Qu’al premier no fezis, sius platz.
		E ten la batailla eissamen:
		De las mazas fer duramen
	55	Tals colps, quel bruich fai espaven,
		Quan s’encontran los talabatz.
VIII		E pos de batailla bem vai,
		Que combatre posc ben e sai,
		Et on plus josti plus me plai,
	60	Be son a tort veillz apellatz.
		Mas, se a caval o a pes
		La domna ab me s’en combates,
		E per batailla me aproes,
		Bem tegra pois per fort vizaz.
IX	65	Messager, porta mon fablel
		E la Marca, lai a ’N Sordel,
		Qu’en faza juzamen novel
		Lejal, aissi com es usatz,
		Si qu’en sia desencolpatz.