De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Code: 334,001 Auteur: Peire de la Cavarana Genre: Sirventes Numero: X

D’un serventes faire

I	1	D’un serventes faire
		Es mos pessamenz,
		Qel pogues retraire
		Viaz e breumenz;
	5	Quel nostr’ Emperaire
		Ajosta grans genz.
		Lombart, beus gardaz
		Que ja non siaz
		Pejer que compraz,
	10	Si ferm non estaz!
II		De son aver prendre
		Nous mostraz avars:
		Per vos far contendre
		Ja non er escars:
	15	Sil vos fai pois prendre,
		L’avers er amars!
		Lombart, beus gardaz.
III		De Pullaus sovegna
		Dels valens baros,
	20	Qu’il non an que pregna,
		For de lor maisos;
		Gardaz non devegna
		Autretal de vos!
		Lombart, beus gardaz.
IV	25	La gent d’Alemaigna
		Non voillaz amar,
		Ni ja sa compaigna
		Nous plaza usar,
		Car cor m’en fai laigna
	30	Ab lor sargotar.
		Lombart, beus gardaz.
V		Granoglas resembla
		En dir: broder, guaz;
		Lairan quant s’ asembla
	35	Cum cans enrabjaz;
		No voillaz ja venga!
		De vos los loingnaz!
		Lombart, beus gardaz.
VI		Deus gart Lombardia,
	40	Boloign’ e Milans
		E lor compaignia,
		Brexa e Mantoans,
		C’us d’els sers non sia,
		Els bos Marquesans.
	45	Lombart, beus gardaz.
VII		Deus sal en Sardegna
		Mon Malgrat-de-toz,
		Car genz viu e regna
		E val sobre toz,
	50	C’us tant larcs nos segna
		De neguna voz.
		Lombart, beus gardaz.
VIII		Saill d’Agaiz, bem platz
		Car tant gent regnaz,
	55	Verones honraz,
		E si ferm estaz.
		Lombart, beus gardaz.