Oroz Arizcuren, Francisco J. La lírica religiosa en la literatura provenzal antigua. Pamplona: Excma. Diputación Foral de Navarra - Institución Príncipe de Viana, 1972.

Edición crítica, traducción, notas y glosario. Versión revisada para Corpus des Troubadours, 2011.

Code: 124,015 Auteur: Daude de Pradas Genre: Chanson religieuse Numero: X

Qui finamen sap cossirar

I	1	Qui finamen sap cossirar
		lo dous dezir, lo dous pensar
	3	que fis cors a per fin’amor,
		finamen ab fina sabor
		en fin’amor si deu fizar.
	6	Amors vens tot’autra doussor:
		Quals amors? Silh que tot perpren,
		ses fin e ses comensamen:
	9	Dieus es fin’amors e vertatz,
		e qui Dieu ama finamen
		finamen es de Dieu amatz.
II	12	Totz hom qui ben pot afinar
		son cor en Dieu, e desamar
		so que Dieus ten a desamor,
	15	d’amor sent aissi bon’odor
		que nulha res non l’es amar.
		Amar deu hom ben tal senhor
	18	que nostra mort aucis moren;
		vencutz d’amor, venquet sufren;
		finamen amet desamatz:
	21	elh es qui·l ben d’amor enten,
		amors part totas amistatz.
III		Bos es e vol sos bes mostrar;
	24	sos bes als bos no vol celar,
		del mal fai bo, del bon melhor;
		be fai al bo, neys al peior
	27	fai be, quar totz los vol salvar.
		Qui be vol, prec lo salvador,
		quar elh es cel bes veramen
	30	que mena·ls bos a salvamen;
		elh es salutz e salvetatz,
		bes sobre·ls bes; qui tal guiren
	33	aura, per luy sera salvat.
IV		Dompna, tu non aguist anc par
		en cel, en terra ni en mar;
	36	verges, maire del salvador:
		tos pretz val part tota valor
		apres selh qu’om non pot prezar;
	39	honrada sobre tot’honor,
		tal rey onratz onradamen,
		lo rey dels reys, qu’aissi granmen
	42	per conort a nos totz honratz.
		Apres luy, e ses tot conten,
		trastotz los gras d’onor montatz.
V	45	Al tieu laus no pot laus montar:
		Quals laus si pot al tieu levar
		que de totz laus portas la flor?
	48	Lo tieus laus fai lauzar lo lor
		de selhs qu’an cor de te lauzar;
		pel tieu laus au Dieus la lauzor
	51	de selh qu’en te lauzar s’empren.
		Lo tieus laus es sieus eissamen,
		del tieu laus si ten per lauzatz;
	54	e qui te lauzon leyalmen
		ab Dieu es lor cors aloguatz.
VI		Lo solhelhs clars fai lo iorn clar;
	57	mas sa clardatz enlumenar
		non pot lo iorn per sa clardor
		si com tu·l cor de peccador;
	60	quan be lo denhatz reguardar,
		Dieus, qual clardat, qual resplandor!
		Ricx es qui la ve e la sen.
	63	Sentir? No sent us entre cen!
		Per que? Quar cossen a peccatz.
		Qui peccat sen, pueis i cossen,
	66	no sen Dieu ni ve sas clardatz.
VII		Qui novelh chan volra chantar,
		chant chan de Dieu ses deschantar,
	69	qu’el no vol autre chantador:
		tug autre chant tornon a plor.
		Dieus don que no·l puesc’enchantar
	72	enchans de mal enchantador
		qui sest chan chant’alegramen;
		e qui·l chantet premeiramen
	75	totz temps chant el d’alegretatz:
		don en chantan mon chan prezen
		a vos, on que sia chantatz.
VIII	78	Qui sest chan chantara soven,
		de Dieu sia benaüratz.
		Diguatz ‘amen’ tug ben-volen,
	81	que selh vos am cui vos amatz.