De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Code: 217,004a Auteur: Guillem Figueira Genre: Sirventes Numero: CXXXIII

Ja de far un sirventes

I	1	Ja de far un sirventes
		Non chal q’om m’ensegn,
		Qe ben hai l’art el giegn
		De dir e mal e bes;
	5	Tant ai vist et apres
		D’un ric croi sun captegn;
		Per q’ieu non m’en puesc taire;
		E s’ieu als en pogues?
		A gran fastic m’o teing
	10	Qar de lui sui chantaire.
II		Mas iram forz’em destreing
		Em fai chantador
		Del nostr’Emperador,
		Q’auci pretz e l’esteing
	15	E, tant qant pot, s’empeing
		Qe fassa desonor;
		Per qe be m’es vejaire
		Qe trop longamen reing,
		Qar trop son sei labor
	20	Vergoignos per retraire.
III		Li plus fin conoiscedor
		Blasmon son afar;
		Mas ieu nol voil blasmar,
		Enanz l’apel segnor
	25	Vil e ramponador
		E cobes et avar
		E tal qi non ha gaire
		Vergogna ni temor
		De negun malestar
	30	Q’el puesca dir ni faire.
IV		Li franc baro d’Outramar
		L’an ben cognogut,
		Qe molt cujet mal frut
		Entre lor semenar;
	35	Q’el volc deseritar
		Lo segnor de Barut
		Els autres de repaire;
		Mas nol poc acabar,
		Car Dieus, per sa vertut,
	40	L’en fon a son contraire.
V		Ara somon c’on l’aiut
		Davas totas partz,
		Qe, passat aquest martz,
		Vol mostrar son escut
	45	A Melan; mas nol cut
		Ja sia tant auzartz
		Qe s’en auz enanz traire,
		Si tot l’a convengut,
		Car es vils e coartz
	50	Et avols guerrejaire.
VI		E cuja venzer Lombartz
		Totz a son coman;
		Pero qar vai chazan
		Per bosc e per eissartz
	55	Ab cas et ab leopartz?
		E qar men’aurifan?
		Ben es fols l’Emperaire
		E nesci e musartz,
		Si zo qe vai pezan
	60	Cuja tot a cap traire!
VII		Non traira, per San Johan,
		Ugan tot a cap
		Son penzer ni sun gap;
		Aissous pliu e vos man;
	65	Doncs de qe pessa tan?
		Q’unz penz’et autre sap;
		E totz nescis penzaire
		Perchaza leu son dan
		Tro qe ven a mescap,
	70	Si s’en pot leu estraire.
VIII		A Manfrei Lanzal man,
		Car el conois e sap
		Alques de son afaire.