De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Code: 080,008 Auteur: Bertran de Born Genre: Sirventes Numero: XI

Bem platz quar tregua ni fis

I	1	Bem platz quar tregua ni fis
		No rema entrels baros,
		Qu’ades plantavan boissos,
		Tan aman hortz e jardis,
	5	Aise ab pauc de companha;
		Semblas guarden d’ansessis
		Que ja lai on us d’els fos
		Non entreratz ses mesclanha.
II		Ancaras i aura ris,
	10	E be lieu amaran nos
		Et acolhiran los pros
		E daran dels barbaris,
		Si volon qu’ab lor remanha;
		Que ja per cridar: «Paris!»,
	15	Senes autras messios,
		No conquerran gent estranha.
III		Ja no crezatz qu’om ressis
		Puoj de pretz dos eschalos,
		Mas, al soteira, de jos,
	20	Pot ben estar quietz e clis
		Et en aquel que remanha;
		Que per mil marcs d’esterlis
		Non poiria pojar dos,
		Tan tem qu’avers li sofranha.
	25	Be volgral reis fos devis
		E que passes sai mest nos
		E que saubes dels baros
		Quals l’es fais ni quals l’es fis,
		E conogues la malanha
	30	De que clocha Lemozis,
		Qu’era sieus, e foralh bos,
		Mas us sobros lolh gavanha.
V		Be volgra en mal chausis,
		Coras qu’ en fos lezeros,
	35	E qu’en passes dos sedos,
		Anz que trop li endurzis,
		Puois vengutz es d’Alamanha;
		E vuolh N’Aimars, lo mesquis,
		E ‘N Guis fassan partizos
	40	Tant engals qu’us no s’en planha.
VI		Mariniers, ges pels Chanzis,
		Sils alberja’ N Malmiros,
		Nom fassatz mal a rescos!
		Nous en serai plus aclis
	45	Ni pe’ N Peiro La Chassanha,
		De que s’es mal menatz Guis
		Ves me de doas preisos,
		En amor e en companha.
VII		Papiols, ja’ N Frederis
	50	No feira aital barganha
		Com fetz sos filhs N’Aenris,
		Quan pres romieus ab bordos,
		Don pert Polha e Romanha.