De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Code: 364,047 Auteur: Peire Vidal Genre: Canso Numero: XII

Tant an ben dig del Marques

I	1	Tant an ben dig del Marques
		Joglar truant e garbier;
		Que tuit en son vertadier;
		Qu’eu no sai que m’en disses;
	5	Pero sua es Valensa,
		On bos pretz nais e comensa,
		Ei renovela valor,
		En fai dir vera lauzor.
II		E, sil reis Aragones
	10	No m’agues tout alegrier,
		Eu agra fin gaug entier
		Ab domnas de Carcasses,
		Don m’abelis e m’agensa
		Lor faitz e lor captenensa,
	15	El cavalier el comtor
		El baron el vavassor.
III		Per so m’an Lombart conques,
		Pos m’appellet car messier
		Tals, qu’anc no vist nulh arquier
	20	Tan dreg ni tan prim traisses;
		Em fier al cor, ses falhensa,
		Ab un cairel de Plazensa,
		Fabregat el foc d’Amor,
		Temprat de doussa sabor.
IV	25	E l’olh el cil negr’ e espes
		El nas qu’es en loc d’arbrier,
		Veus l’arc de qu’aitals colps fier
		Ab un esgart demanes,
		Don escutz nolh fai garenza;
	30	E pos a leis platz quem vensa,
		No m’o tenh a dezonor
		Sils fortz venson li forsor.
V		Tant es sos bels cors cortes
		El dig gai e plazentier
	35	Qu’el mon non a cavalier
		Que vezer no la volgues;
		Que fag e dig e parvensa
		A de Monbel e d’Argenza,
		E de Monrozier color,
	40	E sa cambra es de Valflor.
VI		Mil tans es doblatz sos bes
		Quel comte de l’escaquier,
		Qu’al seu fin pretz vertadier
		No sofranh neguna res;
	45	Pos m’autrejet ses bistensa,
		M’a tengut lai, en Proensa,
		Qu’ar sai son en mais d’onor;
		E deu s’om penr’ al melhor.
VII		E si mos Fraires saubes
	50	Quim rete per soudadier,
		Nol tengran bojas d’acier
		Que vezer no la volgues;
		E trobera, ses falhensa,
	55	Dous frug d’onrada semensa,
		E cort de valen senhor
		Ab un avinen trachor.