De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Code: 364,014 Auteur: Peire Vidal Genre: Canso Numero: XIII

Bon’aventura don Dieus als Pisans

I	1	Bon’aventura don Dieus als Pisans,
		Car son ardit e d’armas ben apres,
		Et ant baissat l’orguoill dels Genoes
		Qels fan estar aunitz e soteirans;
	5	Per qu’eu volrai totz temps l’onor de Pisa,
		Car ant baissatz los perfieitz orgoillos,
		Que sol l’enois dels vilans borboillos
		Mi trencal cor el me fraing el me brisa.
II		Alamans trob deschausitz e vilans,
	10	E qand negus se feing esser cortes,
		Ira mortals, cozens et enois es,
		E lor parlars sembla lairar de cans;
		Per q’ieu non vuoill esser seigner de Frisa
		C’auzis tot jorn lo glat dels enoios,
	15	Anz vuoill estar entrels Lombartz joios,
		Pres de midons q’ es gaia, blanca e lisa.
III		E pois mieus es Monferratz e Milans,
		A mon dan get Alamans e Tyes;
		E sim creira Richartz reis dels Engles,
	20	En breu d’ora tornara per sas mans
		Lo Regisme de Palerm’ e de Riza,
		Car lo conquis la soa rezenssos;
		De mi dic ben: si pel Marqes non fos,
		Non pretz cinc marcs una rota camisa.
IV	25	Era m’alberc Dieus e sains Julians
		E la doussa terra de Canaves;
		Q’en Proensa non tornarai eu ges,
		Pois sai m’acuoill Laveirans et Aillans!
		E, s’aver puosc cella q’ai tant enquisa,
	30	De lai s’estei lo valens reis N’Anfos!
		Q’ieu farai sai mos vers e mas chanssos,
		Per la genssor c’anc fos d’amor enquisa.
V		E pois Milans es autz e sobeirans,
		Ben volgra patz de lor e dels Paves
	35	E que estes Lombardi’ en defes
		De crois ribautz e de mals escarans.
		Lombart, membreus cum Poilla fo conquisa,
		De las dompnas e dels valens baros
		Cum los mes hom en poder de garsos!
	40	E de vos fan entr’ els pejor devisa!
VI		E, N’Alaçais, tant vos ai ades quisa
		Q’ar l’uns en ten l’autre per enoios;
		Eu remandrai tant qan er faitz lo dos,
		Qar genser es qe anc fos d’amor enqisa.