De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Code: 457,042 Auteur: Uc de Sant Circ Genre: Sirventes Numero: CXXXV

Un sirventes vuelh far en aquest son d’En Gui

I	1	Un sirventes vuelh far     en aquest son d’En Gui
		Que farai a Faiensa     mandar, a ’N Guillami
		Et al comte Gui Guerra     e ’N Miquel Morezi
		Et a ’N Bernart de Fosc     et a sier Ugoli,
	5	Et als autres que son     layns de lor fe fi;
		E sapchan, cum qu’a lor     de laindre esti,
		Quel sens el noms el pretz     el laus qu’om de lor di
		Los corona d’onor,     sol fassan bona fi.
II		Bona fi deu ben far,     e Dieus li deu far be,
	10	Qui franquez’e dreitura     e la Gleisa mante
		Contra cel que non a     en Dieu ni en leis fe,
		Ni vida apres mort     ni Paradis non cre,
		E dis c’om es nienz     despueis que pert l’ale,
		E crueltaz l’a tolta     pietat e merce
	15	Ni tem laida faillida     faire de nuilla re,
		E totz bons fatz deshonra     e baiss’e deschapte
III		Sil chaptel coms Raimons,     gart qu’en fassa son pro,
		Qu’eu vi quel Papal tolc     Argens’e Avigno
		E Nemz’e Carpentras,     Vennasqu’e Cavaillo,
	20	Usetge e Melguer,     Rodes e Boazo,
		Tolzan et Agenes     e Caortz e Guordo,
		En mori sos coingnatz,     lo bons Reis d’Arrago;
		E, s’el torn’a la preza     per aital ochaizo,
		Encar l’er a portar     el man l’altrui falco.
IV	25	Lo falcos, fils de l’aigla,     quez es Reis dels Franses,
		Sapcha que Frederics     a promes als Engles
		Qu’el lor rendra Bretaingna,     Anjou e Toarces,
		E Peitau e Saintonge,     Lemoge et Elgolmes,
		Toroinn’e Normandia     e Gujan’el Paes,
	30	En venjara Tolzan,     Bezers e Carcasses ;
		Doncs, besoigna que Fransa     manteingna Milanes
		E N’Albaric, que tolc     que lai passatz non es.
V		Passatz lai fora ben,      s’el n’agues lo poder,
		Que de ren als non a     desirier ni voler
	35	Mas com Frans’e la Gleisa     el pogues decazer,
		E la soa cresensa     e sa lei far tener;
		Doncs, la Gleisa el Reis     i devon pervezer
		Quens manden la crosada     ens veingran mantener;
		Et anem lai en Poilla     lo Regne conquerer,
	40	Car cel qu’en Dieu non cre     non deu terra tener.
VI		Ges Flandres ni Savoia     nol devon mantener,
		Tant lor deu de l’eleg     de Valensa doler.