De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Code: 015,001=392,001 Auteur: Albert Marques , Raimbaut de Vaqueiras Genre: Tenso Numero: XV

Aram digatz, Rambautz, si vos agrada

I	1	Aram digatz, Rambautz, si vos agrada,
		Sius es aissi, cum eu auch dire, pres,
		Que malamen s’es contra vos guidada
		Vostra dompna de sai, en Tortones,
	5	Don avetz faich mainta cansson en bada;
		Mas ill a faich de vos tal sirventes
		Don etz aunitz et ill es vergoignada,
		Que vostr’amors noil es honors ni bes
		Per q’ella s’es aissi de vos loignada».
II	10	«Albertz marques, vers es q’ieu ai amada
		L’enganairitz don m’avetz escomes,
		Que s’es de mi e de bon pretz ostada;
		Mas non puosc mais, qu’e ren noil ai mespres,
		Anz l’ai totz temps servida et onrada;
	15	Mas vos e lieis persegua vostra fes
		C’avetz cent vetz per aver perjurada!
		Per qeis clamon de vos li Genoes,
		Que, malgrat lor, vos empeignetz l’estrada».
		«Per Dieu, Rambautz, d’ aissous port garentia:
	20	Que, maintas vetz, per talan de donar
		Ai aver tout, e non per manentia
		Ni per thesaur q’ieu volgues ajostar;
		Mas vos ai vist cen vetz per Lombardia
		Anar a pe a lei de croi joglar,
	25	Paubre d’aver e malastruc d’amia,
		E feiraus pro qius dones a manjar;
		E membre vos cous trobei a Pavia».
IV		«Albertz marques, enoi e vilania
		Sabetz ben dir e mieils la sabetz far;
	30	E tot engan e tota fellonia
		E malvastat pot hom en vos trobar
		E pauc de pretz e de cavallaria;
		Per qeus tolgront, ses deman, Val de Tar,
		E Peiracorva perdetz per foillia,
	35	E Nicolos e Lanfrancos da Mar
		Vos podon ben appellar de bausia».
V		«Per Dieu, Rambautz, segon la mi’ esmanssa,
		Fesetz que fols, qan laissetz lo mestier
		Don aviatz honor e benananssa;
	40	E cel qeus fetz de joglar cavallier
		Vos det enoi, trebaill e malananssa
		E pensamen et ir’ et encombrier,
		E tolc vos joi et pretz et alegranssa;
		Que, puois montetz de ronssin en destrier,
	45	Non fesetz colp d’espaza ni de lanssa».
VI		«Albertz marques, tota vostr’ esperanssa
		Es en trazir et en faire panier:
		Enves totz cels c’ab vos an acordanssa
		E queus servon de grat e volontier
	50	Vos non tenetz sagramen ni fianssa;
		E s’ieu non vail per armas Olivier,
		Vos non valetz Rotlan, a ma semblanssa,
		Que Plasensa nous laissa castaignier:
		Tol vos la terr’ e non prendetz venjanssa!».
VII	55	«Sol Dieus mi gart, Rambautz, Mon-Escudier
		En cui ai mes mon cor e m’esperanssa,
		A mon dan get vos e tut lor empier,
		Vis de castron magainhat, larga panssa!».
VIII		«Albertz marques, tuich li vostre gerrier
	60	Ant tal paor de vos e tal doptanssa
		Qu’il vos clamon lo Marques putanier,
		Deseretat, desleial, ses fianssa!».