De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Code: 457,008 Auteur: Uc de Sant Circ Genre: Sirventes Numero: CXLIV

Chansos q’es leus per entendre

I	1	Chansos q’es leus per entendre
		Et avinenz per chantar,
		Tal qu’om non puoscha reprendre
		Los motz, nil chant esmendar,
	5	Et a doutz e gai lo so,
		E es de bella razo,
		Ed avinenz per condar,
		Mi plai, e la voil lauzar
		A qi la blasm’, e defendre.
II	10	E aicel qe vol reprendre
		Nesun hom del seu trobar
		Deu premierament aprendre
		Com el puesca razonar
		Per dreig zo q’en vol razo
	15	E sel tortz es sieus o no,
		Si qu’el s’en puesca salvar;
		Mas nos fai a chastiar
		Hom fols, ne ab lui contendre.
III		Savis hom qe vol emprendre
	20	Null grant faig, ni comenzar,
		Deu primeiramen atendre
		Entro qu’el veja per clar
		S’el fai sen o faillizo;
		Qe fols es qi mou tenzo
	25	E non puesca guerrejar,
		Don li convengn’ad anar
		Per forza s’a merce rendre.
IV		Hueimais n’er ma dolors mendre,
		Car aug caser e baisar
	30	L’orguoyll, el poder deiscendre
		D’en Aiselin, e mermar;
		E tut li sieu dan mi so
		Legretatz mais ce miei pro,
		El siei gioi mi fan plurar,
	35	El siei enuoi alegrar,
		E di bes lo cor atendre.
V		Mal l’an fait son temps despendre
		Li lag faig qu’eil a fag far:
		Domnas ardre e enfans prendre
	40	E piusellas espadar,
		E mainta religio
		Metr’a fuoc et a carbo,
		Don arz so crotz et altar,
		Hai, Deus! Com podetz estar
	45	D’aitals faigs venjanza prendre?
VI		Se Dieus, e breu de saiso,
		De lui non prent vengiaso,
		Mantas giens fara lagnar
		De si, e fara cudar
	50	C’Il lo voylla en gratz prendre.