Beltran, Vicenç. [Tipos y temas trobadorescos, IX.] L'infant Pere, Cerverí de Girona i Pero Mafaldo. "Studi Mediolatini e Volgari", 39 (1994), pp. 9-31.

Code: 434a,028 Auteur: Serveri de Girona Genre: Sirventes Numero: -

Hom no pot far sirventes mas sirven

I		Hom no pot far sirventes mas sirven:
		no pot sirvens desservir per razo,
		ans deu servir sirvens tota sazo
		e, si desserv, son nom pert de sirven
	5	e deu l'om dir per dreig, ez es sazos,
		deservidor, car axi con dels proz
		nays proeza, ve seruirs de sirven,
		e deservi[r]s, d'aycels que fan oltratge.
II		Eu soy sirvens e serviray breumens
	10	d'un sirventes al bo rey d'Arago
		ab motz plazens, car chan de plazer so
		dreit sirventes, no l'autri maldizen:
		enans son be dessirventes dels bos.
		Si voletz dir que chastio·ls baros,
	15	en valon may[s]; chastiar deu hom gen,
		c'amor[o]s ditz adoucix brau coratge.
III		Servir deu hom a Deu primeramen,
		car Deus a faig tot quant es ne anc fo
		e ser sos sers e aucis Farao
	20	qui·l deservic, e ambduy son g[u]iren
		que de servir ve gratz e gazardos,
		e ant'e dans, per mal far en perdos,
		e, car le reys ser Deu, dic l'a presen
		sirven d'onor, si tot s'es de paratge.
IV	25	Apres deu hom servir a tota gen,
		c'axi tenc eu tot servidor per bo;
		e si de totz no cobra gasardo,
		us bos servitz, per totz gasardo ren.
		Pero no tenc home per cabalos
	30	qui·s vol servir si no ren, per un, dos,
		car [ser]vicis senars leu romp e fen,
		e, qui·l dobla, a y trop bo usatge.
V		Mas nos camjam be far per falimen
		e cobeytat prendem per messio
	35	e leyaltat lexam per tracio
		e franqueza per mal enseynamen,
		car tant em tuit de falir coratyos
		que, si jazers de femna merce[s] fos,
		ne tolr'avers, justars d'aur ne d'argen
	40	ne gen manjars, tot nos fora salvatge.
VI		Si·l nostr'Enfans, N'Ardoartz e N'Amfos
		e·l coms de Foix e·n Raimonz [e·n] Gastos
		fosson eras en aytal estamen
		con eu volgra, mays prezer'on paratge.
VII	45	Pel Reys si·l platz me sia faitz perdos
		d'est sirventes, e pot lo be per dos
		pendre d'altres c'an faitz man pauc saben;
		e parlera d'als sol no·n teng[u]es gatge.