De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Code: 461,107 Auteur: Anonyme Genre: Planh Numero: CLXXIII

En chantan m’aven a retraire

I	1	En chantan m’aven a retraire
		Ma gran ira et ma greu dolor;
		Non chan ges con autre chantaire
		Que chanta de joi e d’amor;
	5	S’eu chan de boca, de cor plor,
		C’a chantar m’es razos contraire;
		Per que mos chanz a nom chan–plor,
		Que chanz nom pot de plor estraire.
II		Ben deu cel plorar e dol faire
	10	Que pert amic ni bon segnor,
		Ni ja hom, tro que n’es perdaire,
		Non saura d’amic sa valor;
		La mortz m’a fait conossedor
		De mon damnage non a gaire;
	15	Tuit cil c’amon prez ni valor
		Devon doler d’aquest afaire.
III		Morz nos a tolt lo debonaire,
		Lo pro patriarcha Gregor,
		On avian fait lor repaire
	20	Tuit li bon aib e li mellor;
		Qui veira mais tal guidador,
		Tan pro, tan franc, tan lare donaire?
		Passat avia de largor
		Alixandre que venquet Daire.
IV	25	De lui fes Valors essemplaire
		E Lialtatz castel e tor:
		Als bos fo francs e mercejaire,
		Plen d’umiltat e d’alegor;
		Los crois teni’en tal rancor
	30	Per re non li podion plaire:
		Aras sabran gran e menor
		Que pert lo filz can mor lo paire!
V		Assaz podon cridar e braire
		Friolan el veizin d’entor,
	35	Car be savon lor aversaire
		Qu’il an perdut lo bon pastor
		Qui los deffendia d’error,
		Els crois fazia arreras traire:
		Lairon, predon e raubador
	40	An joi, car manz en fes desfaire.
VI		Dieus non fes rei ni enperaire
		Dels crois tal justiziador,
		Tal guerrier ni tal deffendaire
		Dels sieus, ni ab tan de vigor
	45	Que lai on jazia en langor,
		Que greu si podia sostraire,
		N’avion li croi tal paor
		Que non ausavon vezer l’aire.
VII		Laissus, en son sant luminaire,
	50	O son martir e confessor
		Meta s’arma lo ver Salvaire
		E la deffende de tristor;
		Car, s’anc nulz om per gentil cor,
		Per lialtat ni per maltraire,
	55	Deu intrar el palais auchor,
		Gregors de Montlonc en es fraire.
VIII		Mon chan–plor tramet a la Maire
		De Jesu Crist lo Salvador,
		E quier li com umil pecaire
	60	Que prec son Filz, per sa dolzor,
		Qu’en la celestial baudor
		On son li Patriarche maire
		Meta l’arma d’aquest ab lor;
		Toz om en deu esser pregaire.
IX	65	A l’Archidiaque t’en cor,
		Chan–plor, que te sia gardaire:
		Car a del lignage la flor,
		Be deu al bon oncle retraire.