De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Code: 461,d Auteur: Anonyme Genre: Narration allégorique-didactique Numero: CLXXXVIII

Compagnon, en pessamen 

		IL «CHASTEL D’AMORS»
I	1	Compagnon, en pessamen
		Soi de far un bastimen,
		Un chastel cortes e gen,
		Co iel puesca, sajamen;
	5	Ecvos en comenchamen
		Per qual mesura er bastitz.
II		En primer vos sera ditz
		Lo chastel com er asitz:
		. . . . . . . . . . dousa a la raditz,
	10	E albres grans e petitz,
		. . . gaug, voltas e critz
		D’aucels, lanquant chanton mais.
III		Aqestz chastels es mon zais,
		Qar hom dedinsz no s’irais:
	15	Totz temps sera san e gais;
		Qe l’hom quez i entra lais
		Ni a çoi fi e verais
		No es pas tan deleichos.
IV		Fe a que es amoros
	20	De solas e de canchos,
		De chantar es engoisos
		E de vertutz s’es sonhos;
		Don qe hom sa las pros
		Se be seon belladors.
V	25	Aqestz chastels es d’Amors,
		Seinher des autres seinhors,
		Que tenon las hautas tors
		So son las domnas meillors
		C’an lur cor vers amadors
	30	Qe per lor amor van gai.
VI		Dinsz aqest chastel no vai
		Domna q’am home savai,
		Mas tal amic q’i eschai;
		E domna dedinsz no vai,
	35	Se d’amor no es en plai,
		De fach o d’asentimen.
VII		Qest chastel hai fat ab sen
		Ab grantz costç de juven,
		E ab tal enchantamen
	40	Qe hom nol ve se nol ten
		De ditz e de pensamen,
		C’al totz faitz es finad.
VIII		De veer son li fossad
		El mur son de volontad,
	45	Et lanqant veson agrad,
		E ja no i sera fortad
		Qi ab saber nol conbad
		O ab plaszer, qil sap far.
IX		Las portas son de parlar
	50	A l’ensir et a l’entrar;
		Qui gen non sab raszonar
		Defors li ven a estar;
		E las claus son de prejar:
		Ab cel obron li cortes.
X	55	Dedinsz la clauson q’i es
		Son las maszos dels borges
		O l’estraing fan lur conres;
		So son trop adreitas res:
		Joias e anels trames
	60	Per entresseignas d’amor.
XI		Lainsz son li vavasor,
		Cels qi servon lor seinhor:
		Donzellas de gran valor
		Q’hom prega per grant douchor
	65	De son be e de s’onor
		Aqi o es major atz.
XII		L’autre portals es fermatz
		Totztemps d’estar als privatz,
		De basars soau donatz,
	70	No ges com vilana patz;
		E, pois aquest es passatz,
		Pois no i ha nul defensal.
XIII		Mas qui passa qest fermal
		E plus aenant non sal
	75	A ferir fa res a mal;
		E cil qu’i met retenal,
		Pois hom en aitan i fal,
		Non sap gaire pro d’amar.
XIV		Lainsz se degra soing dar
	80	Q’hom no l’en puescha gignar
		Qi vol la forcha gardar;
		Qe, sel pas lassa passar,
		Ja pois aenan nol gar,
		Mais meta l’en chausimen.
XV	85	Dedinsz aqest mandamen
		Estan Dolces’e Joven:
		D’acugir e de presen
		Son, e de respondre gen
		E d’atendre convinen,
	90	Pois ja no i er faills negus.
XVI		Las salas el torn desus
		Son de manear los plus
		E de jazer en luec clus
		Totas nudas ab los nus;
	95	E las fenestras e l’us
		Son faitas de bels scemblans.
XVII		Primer li mur fan envans
		De gran mal et de afans
		Que fan soffrir als amans
	100	Trosque sajan lur talans;
		Quar non l’acoillon enans,
		Don l’an ben recognogud.
XVIII		Las chambras son de salud
		Al partir qu’el an agud,
	105	E de plaidejar lors drud,
		Qan forfaig i es nascud
		E de celar car tengud
		Ester aqi o a luec.
XIX		Lor celarer e lur coec
	110	Son tuit de ris e de joec
		E de parlar ses ennuec;
		Lainsz non cal autre foec
		Mas Amor, per q’eu moec
		Qui lur fai estiu tot l’an.
XX	115	Lainsz non venon ni van
		Merchadier ni negosan;
		Ne ja re q’i atalan
		Hom per aver noi deman,
		Mas sol ço qu’es de gran ran,
	120	Q’aiço tenrian a mal.
XXI		Mais una gerra mortal
		A mari deu no lor val
		E a gelos autetral,
		E lausengier desleial
	125	D’Ani-nuou tro a Nadal,
		Don a li guerr’e estorn.
XXII		Aqest van oscur e morn;
		Contra celas, dinsz lo torn,
		Conbaton la nueit el jorn;
	130	Mais non son ges en sojorn,
		Qe plus prim q’ab arc d’alborn
		Lur fan traire lur archiers.
XXIII		Lainsz an arbalisters
		Qui las defendront dals gerrers,
	135	Voltas e gentz traversers
		Qe lanchan als plus parlers
		Proverbis e reprovers
		Ab qe fan mans esbaitz.
XXIV		E fan escutz d’esconditz
	140	Ab qes cobron dals maritz,
		E lanzas ab fers forbitz
		Fan de sacremens plevitz,
		Ab qe nafranls plus harditz,
		Qan ven al majer beson.
XXV	145	Es aicil qi nafr’e pon,
		Aplana soau e on,
		E, se nul’ira i jon,
		Lo plaidejar no es lon,
		E fai s’en mal donar son
	150	Qui pro non sa d’escremir.
XXVI		Lor osberc son de soffrir
		Q’ant, es coven a vestir,
		Per manazas, pauc blandir
		E per spaven, qil vol dir;
	155	Pois s’en comenchan garnir,
		Fan petit per capdellars.
XXVII		Lor helmes lutzent e clars
		Son tot de gent raszonars:
		Qant hom las cuida encolpars
	160	Fan ver menchonjas scemblars
		E lur tort si adrechars
		Qe ja no n’eissira mal.
XXVIII		Lor cotas e lur segnal
		Son totas, ieus dirai qal,
	165	De cortes sen natural;
		Aissis veston d’aisso tal
		Q’hom re roijad ni fal
		Noi pod trobar ni veszer.
XXIX		Qi el chastel pod aver
	170	Ostal, o puosca caber,
		Segur po annar e jaszer;
		E ja no li cal temer
		Qe re per estraing poder
		Lai perda de son gadan.
XXX	175	Dinsz lo chastel seguran
		Estan cellas a cui tan,
		Cui presz ni joi non sofran;
		Toz lur sojorn e lur ban
		Son ditz e messatge stran
	180	Qi da loing lur son trames.
		* * *