Mouzat, Jean. Les poèmes de Gaucelm Faidit. Troubadour du XIIe Siècle. Paris: A. G. Nizet, 1965

Code: 167,028 Auteur: Gaucelm Faidit Genre: Canso Numero: 3

Ges de chantar non aten ni esper

I	1	Ges de chantar non aten ni esper
		temps ni sazo, chant d’auzels, flor ni fueill,
		mas vos, dona, tot aital com eu vueil
		et trop meillor que neus no sai voler —
	5	car m’etz enans e respiegs, e guirensa,
		gaugs e delitz, caps et comensamens ;
		per qu’ieu en vos mueu mos chans e comens,
		on joy e pretz creix e naix e s’agensa.
II		Per qu’ieu en gaug sojorn e m’alezer,
	10	car vostr’amors si me denh e m’acueill,
		en unquec jorn enques mais que nos sueill —
		En amar be meillur outra poder,
		mas non aus far segon mon cor parvensa
		que vos, domna,-m podetz esser guirens,
	15	c’anc no-m destreis volontatz ni talens
		tan qu’ieu volgui per mi fezes faillensa.
III		Car ges aitan co-l secgle pot tener
		si com clau mars, cels ni terra com cueill,
		vas nulla part non podon veser ueill,
	20	ni cors pesar ni cujar ni saber,
		en un sol cors tan bella captenensa
		de totz bos aips, c’us non fail ni n’es mens
		que la beutatz, e-ls semblans avinens,
		enforma tot son sen e s’entendensa.
IV	25	Qui per sobras de be ni de plaser
		ni de gran gaug deges aver orgueill
		be-s pot vanar que de cossir se tueill,
		mas eu diray qui m’en fai abstener :
		sobre-saber, mesura e conoixensa —
	30	qu’ieu conosc be, bona dona valens
		qu’a vos m’a dat merces e chauzimens,
		e mon bon cor, e non ges ma valensa.