Mouzat, Jean. Les poèmes de Gaucelm Faidit. Troubadour du XIIe Siècle. Paris: A. G. Nizet, 1965

Code: 167,030a Auteur: Gaucelm Faidit Genre: Canso Numero: 4

Ja non crezatz qu’ieu de chantar me lays

I	1	Ja non crezatz qu’ieu de chantar me lays
		eras, quan vey que n’es locs e sazos,
		ans hueimais dey pus soven far chansos
		quar silh don chan es tan belh’ e tan guaya,
	5	qu’ades m’eschai que per lieys sia guays ;
		e, per la belh’ on joys creys et enansa,
		non puesc mudar qu’en chantan non retraya
		sa gran beutat e-l sieu ric pretz valen,
		que-l ben qu’ieu fatz ven de lieys e dissen.
II	10	Li siey bel huelh clar, amoros, rizen,
		e la beutatz qu’en lieys sojorn e nays,
		ten si mon cor qu’ieu no-m planh ni m’irays
		per malvat bruy de falsa gen savaya,
		qu’ades se fan de mon joy conoissen,
	15	don a cascus tal dol e tal pezansa,
		non pot sofrit que non crit e non braya
		del joy qu’Amors semena entre nos,
		tan son d’amor e de joy enveyos.
III		Sel que d’amor vol esser poderos
	20	no-y pot falhir, si mos bos motz enten,
		qual que domn’ am, ses fals cor recrezen ;
		qu’om de flac cor s’espavent e s’esmaya,
		— e paubre cor fai paubre sofraitos,
		e bos augurs sec la bon’ esperansa —
	25	e qui chauzir pot bon’ amor veraya
		si no-s n’estrai et es vas luy verays,
		qu’ab joy ven joys, et, ab ira, esglays —
IV		Qui de bon cor non tray la pen’ e-l fays
		no sap que-s fay ni es l’amor veraya ;
	30	car, si tant es que s’enuey ni s’estraya,
		en un jorn pert mais que no-n cobr’ en cen —
		e selh que ser Amor dreg ses biays,
		ab belh servir et ab humil semblansa,
		consec hom ben guizardo qui l’aten ;
	35	per qu’ieu conosc que m’es onors e pros
		s’ieu soy ves lieys fis, francs et amoros.
V		Domna, mos bes e mos joys mou de vos
		que d’als non chan ni solatz entre gen ;
		de bon talan m’autrey a vos e-m ren-
	40	e, s’a vos platz, non sufratz que dechaya
		la bon’ amors qu’en joy nos ten abdos ;
		qu’ades m’esfortz, et ai sen e membransa,
		de dir e far tot so que a vos playa,
		et d’enansar vostre pretz tot jorn mays
	45	et endrey vos vuelh esser tos temps jays.