Mouzat, Jean. Les poèmes de Gaucelm Faidit. Troubadour du XIIe Siècle. Paris: A. G. Nizet, 1965

Code: 167,057 Auteur: Gaucelm Faidit Genre: Canso Numero: 6

Tan aut me creis Amors en ferm talan

I	1	Tan aut me creis Amors en ferm talan
		per una bela flor e-l sieu clar vis !
		Blanca, vermeill’ e mesclad’ ab robis,
		plus d’autra ren es de gaia semblansa ;
	5	c’ab sos bels hueils amoros e plazens
		m’a si ferit e nafrat doussamens,
		que tornat soi en la bon’ esperansa.
II		S’ieu soi tornatz amoros per semblan
		e vueill servir son bel cors blanc e lis,
	10	non puesc ren als — c’Amors m’a si sorpris
		que-m fai chauzir la soa fin’ amansa,
		per la meillor e per la plus plazens,
		plus pros, plus savi’e plus conoissens
		que si’al mon, segon ma consiransa.
III	15	Amors m’a fait chauzir la plus prezan
		e-il belazor d’amar, e-ill clam « mercis ! »
		qu’ill es la res que m’a tan gen conquis,
		si que sofrir no-m fes sol malanansa ;
		e si Merces et Amors no la vens,
	20	ill m’ausira sobran en pensamens,
		tant ai lo cor en auta desiransa.
IV		E s’ieu merce li clam, com fin aman,
		la prec d’amor, e-ill leialmens servis,
		be-m degr’ auzir, pos fis pretz es assis
	25	el sieu gen cors, en cui ai m’alegransa,
		que, lai on es beutatz e pretz valens,
		non deu faillir merces ni chauzimens,
		ni guizardos de fin joi, ses duptansa.
V		Si, per merces, merce-ill quier mercejan,
	30	e de genoils, mas jonhtas et aclis,
		la vensera-m Merces ? Laus, so m’es vis,
		d’autor dels pros, conoissens, ses vanansa ;
		e retenra lo pretz e-ill valor gens,
		c’om ditz qu’eschai a beutat et a sens,
	35	que, ses Merce, no-s troba perdonansa.
VI		Ai ! Blancaflor, vermeilla, dous-flairan,
		merce vos clam, e si vos vens Mercis
		vostr’ es lo laus — e mi, en paradis,
		podetz metre de joi e d’alegransa !