Mouzat, Jean. Les poèmes de Gaucelm Faidit. Troubadour du XIIe Siècle. Paris: A. G. Nizet, 1965

Code: 167,037 Auteur: Gaucelm Faidit Genre: Canso Numero: 17

Mon cor e mi e mas bonas chanssos

I	1	Mon cor e mi e mas bonas chanssos
		e tot qant sai d’avinen dir e far,
		conosc q’ieu teing, bona dompna, de vos,
		a cui non aus descobrir ni mostrar
	5	l’amor q’ie-us ai, don languisc e sospire ;
		e pos l’amor no-us aus mostrar ni dir
		ni-l ben q’les-us vuoill, greu m’auser’enardir,
		si-us volgues mal, de mon coratge dire.
II		Al prim q’ie-us vi, m’agr’ops, dompna, que fos,
	10	per c’Amors tant no-us mi fezes amar,
		que non fossetz tant bella ni tant pros
		ni saubessetz tant avinen parlar,
		c’aissi-m pasmei, qan vos vi dels huoills rire,
		d’una doussor d’amor qe-m venc ferir
	15	al cor, qe-m fetz si tremblar e fremir,
		c’a pauc denan no-n mori de desire.
III		Adoncs parti destreitz et envejos
		de vos, dompna, cui desir e teing car,
		si quez anc pois seigner ni poderos
	20	no fui de mi, mas de mon cor celar ;
		per so conosc c’ Amors mi vol aucire,
		e, pois li platz, mout m’es bons à sofrir,
		car autramen non porri’ eu morir
		tant bonamen, ni ab tant doutz martire.
IV	25	Ai ! cum m’a traich mos fis cors amoros
		c’anc mais non fo leus ad enamorar ;
		e qand ieu vei, dompna, luocs ni sazos,
		per nuilla ren no-us aus dir mon penssar ;
		ni vos non platz conoisser mon cossire ;
	30	pero saber podetz leu lo desir
		q’ieu ai de vos, ab maint cortes sospir
		qe-m vezetz far qand vos vei ni-us remire.
V		Tot cant m’acort en un mes o en dos
		de cal guisa-us pogues genseitz prejar,
	35	m’oblit qan vei vostras bellas faissos,
		qe no m’en pot sovenir ni membrar ;
		tant, cant vos vei, soi del vezer jauzire,
		e, qan m’en part, soit en aital cossir
		qe jes la nuoich non puosc el lieig dormir,
	40	ni sai als far, mas plaing e-m volv e-m vire !
VI		Dompna l’afans e-l cossirs m’es tant bos
		qu’on plus i pens e mais i vuoill pensar ;
		et ai ab mi maintas vetz compaignos
		q’ieu volria mais totz soletz estar,
	45	que tant m’es bos quan mi pens ni m’albire
		vostra valor, mas aqui eis m’azir
		e muor quar sai que no-us aus descobrir
		so don lonctemps crei q’ieu serai sofrire.
VII		Linhaure, mout ai estat en cossire,
	50	mas eras sent mon coratg’ esclarzir,
		car ab N’Agout sui, don no-m puosc partir,
		de cui nuills hom non pot trop de ben dire.
VIII		Ai, Doussa Res, per vos sui en cossire,
		quar ieu no-us puesc mon coratg’ esclarzir,
	55	mas vostres sui, e no m’en vuelh partir,
		quar hom de vos no pot sobre-ben dire.
IX		Plus Avinens, ben sai senes falir
		que-l jorn non pot a nulh home venir
		mal, que de cor vos veya ni-us remire.
X	60	Na Maria, tantz bes faitz de vos dir,
		per qe no-n cal a mi de vos ben dire.
XI		Bels Maracdes, tan son vostre desire
		onrat e car, qu’ab joi devez soffrir
		lo ben e-l mal e l’ausar e-l grasir,
	65	lo pensamen e-l trebaill e-l cossire.