Parducci, Amos. Miscellanea di letteratura del Medio Evo. IV. Granet, trovatore provenzale. Roma: Presso la Società, 1929

Code: 189,005 Auteur: Granet Genre: Coblas Numero: IV

Pos anc no·us valc amors, senh' en Bertran

I	1	Pos anc no·us valc amors, senh' en Bertran,
		per c'amas leys, pus no·us ama ni·us senha?
		Que pus no·us a valgut, ia derenan
		no·us cal aver respieg que iois vo·n venha;
	5	que otra mar aug dir que Antecrist renha,
		c'ap los seus ve, que totz sels ausiran
		que no·s volran covertir prezican.
		Per qu'ie · us cosselh que de l'arma· us sovenha,
		e partes vos de leys c' amar no·us denha.
II	10	Amicx Granet, ben m'anatz conortan,
		qu'ie·m tenc per ricx, sol c'ayso s'endevenha;
		car Antecrist sai c'a de poder tan
		que ben pot far, si·s vol, aur fin de lenha.
		Doncx segurs soi que ma dona·m destrenha,
	15	si·l vuelh creyre ni far tot son coman.
		E de may re non ay tan gran talan
		mas que el fos passatz de say Sardenha,
		c'ab luy suy sertz que totz mos mals revenha.
III		Doncx l'aures vos, senher, forsadamen
	20	s'a leys desplatz et Antecrist la·us dona?
		e fares y vas amors falhimen,
		et en amors forsa non es ges bona.
		E sel que pert son plag mal si razona;
		et ilh e vos perdres, las, eysamen
	25	si d’Antecrist crezes son mandamen,
		car comprares la soa plazen persona.
		Si en yfern vostr’arma s'enpreyona!
IV		Ren c’om fassa per son estorsemen
		de mort, tortz es per cert qui·l n'ochaizona;
	30	et yeu era·n vengutz al fenimen
		per leys que a de valen pretz corona.
		Cals tortz er doncx si mos cors s'abandona
		ad Antecrist, pos far me pot iauzen?
		E si pequi ni pert del tot mon sen
	35	pet sa beutat, tan play qui la·m fayssona.
		Mal fara Dieus s'aquest tort no·m perdona.
V		Senher, s'amatz la premieyra, la·us dona;
		ad Antecrist preguatz que·us don ioven,
		car vos es vielhs et ilh vielha issamen.
	40	E pos vilhencs abdos vos dessazona,
		no seria ses ioven l'amor bona.
VI		Amicx Granet, la premieyra·m razona;
		car me camiet, camiar l'ay eyssamen.
		Pos en Sordel n'a ben camiadas cen,
	45	ben puesc camiar una, si no m’es bona,
		et amar leys c'a de fin pretz corona.