Mouzat, Jean. Les poèmes de Gaucelm Faidit. Troubadour du XIIe Siècle. Paris: A. G. Nizet, 1965

Code: 167,017 Auteur: Gaucelm Faidit Genre: Canso Numero: 39

Coras qe-m des benananssa

I	1	Coras qe-m des benananssa,
		Amors, ni q’en fos jauzire,
		ara-m ten sa trencan lanssa
		al cor, de qe-m vol aucire —
	5	mas tant m’auci ab bel martire,
		q’ieu-l perdon ma mort franchamen ;
		bella dompn’ ab gai cors plazen,
		per vos plaing e per vos sospire,
		e ren mas ma mort non aten ;
	10	pero si cum vos platz m’es gen !
II		Mout fui de foll’acordanssa
		e plus fui de fol cossire,
		lo jorn q’en aital balanssa
		volgui mon fin cor assire ;
	15	e puois fui de pejor albire,
		car anc me venc en pessamen
		q’ie-us auzes dir ni far parven,
		dompna, so q’ieu degr’ escondire ;
		mas er, qan non puosc, m’en repen,
	20	que tot so ai faich follamen.
III		Grand ardit e grand doptanssa
		agui, qan vos anei dire
		mon cor ab humil semblanssa,
		don fui plorans descobrire ;
	25	Per merce-us clam q’en dan no-m vire
		s’ieu ai faich vas vos faillimen
		per outracujat ardimen ;
		e no moira car vos desire :
		vostr’ om sui e vostr’ om mi ren
	30	aissi cum vos voillatz, o pren.
IV		Si be-m muor, mal ni pesanssa
		non puosc aver, qan remire
		la vostra bella cundanssa
		e-l doutz esgar e-l gen rire,
	35	e totz los bes q’om pot eslire :
		beutat e gaiez’ e joven,
		honor e pretz, valor e sen ;
		res mas merces no-y es a dire,
		dompna, c’ab merce solamen,
	40	i serian complidamen !
V		Car cel Andrieus, c’om romanssa,
		non trais anc tant greu martire
		per la reïna de Franssa
		cum ieu per vos cui desire ;
	45	mas tant aut etz, per q’ieu m’albire,
		que la non aurai jauzimen
		s’Amors vas mi no lo dissen ;
		e si merces s’i vol assire,
		anc paire, ni autre paren,
	50	non amet vos tant finamen !
VI		Pero d’un pauc d’esperansa
		— sol vostre cors no-s n’azire —
		ai, en dreitura, fizansa,
		que-m fezes, don soi grazire ;
	55	prec vos, com lial sufrire
		dona, que n’ajatz chauzimen,
		qu’ieu no-us deman autre coven,
		mas que-us sia en cantan servire,
		az ops de vostre pretz valen,
	60	que ren als no-i quier ni enten.
VII		Donx, bela dona, membranssa
		n’ajatz, qu’ieu no-us soi mentire,
		e si vostre pretz s’enansa,
		per Dieu, quar vos am, no-us tire !
	65	no-s pot mos maltraitz escrire
		tot sia el vostr’ esgardamen,
		que mi e mon chant vos prezen,
		e vostra chanso, ses desdire,
		lans qu’an ves mon Plus Avinen,
	70	de part vos per acoindamen.
VIII		Na Maria, tan vei plazen
		tot so q’a vos platz far e dire,
		per qe’us son tuich obedien
		li cortes e-il bon e-il valen !