Mouzat, Jean. Les poèmes de Gaucelm Faidit. Troubadour du XIIe Siècle. Paris: A. G. Nizet, 1965

Code: 167,050 Auteur: Gaucelm Faidit Genre: Rotrouenge Numero: 49

Can vei reverdir les jardis

I	1	Can vei reverdir les jardis
		et oi les oizelets chanter,
		et nos est tant dous li marchis,
		me renovelent mei pensier ;
	5	qu’ores me sovient d’un cler vis
		que je ne puis mie oblier…
		qu’en tel damey pozai mon cuer
		don muer et viv’ et viv’ et muer.
II		La bele de cui sui amis
	10	m’a fait passer d’outre la mer,
		et desaisiné mon païs ;
		poruec tant loing ne-m’ fait aler
		que s’amor n’aïe sa requis ;
		por qu’a lui m’est os retorner…
	15	qu’en tel damey pozai mon cuer
		don muer et viv’ et viv’ et muer.
III		Las ! Je sai don sui en error,
		qu’elle aime plus de moi autrui !
		et sai que la n’aura un jor
	20	merci de moi, qui mal a fui,
		s’ele n’oblie sa richor,
		la quel ele est et quel je sui…
		qu’en tel damey pozai mon cuer
		don muer et viv’ et viv’ et muer !
IV	25	Ne puis muer que je retor
		a li qui m’auci et destrui,
		que-l’ cuer m’a blessé d’un’ amor
		qui ver li m’amen’ et m’adui ;
		mais me prein dotanse et paor
	30	que, quan me verra, je l’enui…
		qu’en tel damey pozai mon cuer
		don muer et viv’ et viv’ et muer.
V		Je sais que cel destreit m’auci
		et ja me mene en povreté,
	35	et sai que ja n’aura merci
		si sa richesse et sa beauté
		et son pris ne met en obli,
		mais cil ne l’a mie oblié…
		qu’en tel damey pozai mon cuer
	40	don muer et viv’ et viv’ et muer.
VI		Bone dame, por Dieu vos pri
		o douce franche humilité,
		que regardez ver vostre ami,
		si ferez franchesse et bonté ;
	45	car ja mais Dieu n’aura merci
		de rien si n’a d’autrui pité…
		qu’en tel damey pozai mon cuer
		don muer et viv’ et viv’ et muer.