Oroz Arizcuren, Francisco J. La lírica religiosa en la literatura provenzal antigua. Pamplona: Excma. Diputación Foral de Navarra - Institución Príncipe de Viana, 1972.

Edición crítica, traducción, notas y glosario. Versión revisada para Corpus des Troubadours, 2011.

Code: 248,027 Auteur: Guiraut Riquier Genre: Canso Numero: XXIII

En tot quant qu'ieu saupes

I		En tot quant qu’ieu saupes
		far e dir e pessar,
		me deuri’endressar
		que ab plazer caupes
	5	en grat de la valen
		qu’ieu am de bon talen;
		pus ses lieys ges deport
		non truep de Belh Deport,
		e quar vol tant mos pros
	10	qu’ab so vol serai pros.
II		Per que· m mostra razos
		e·m repren e·m remort
		que, per paor de mort,
		horas, iorns e sazos
	15	no dey abelhimen
		aver de falimen
		tal, que·m puesca forsar;
		ans me dey esforsar
		—pus midons de cort es—
	20	d’esser per lieys cortes.
III		Ben deu esser apres
		selh que perpren auzar
		d’esta dona lauzar,
		qu’en frau no sia pres;
	25	qu’ilh dona e no ven,
		et acapta soven
		a sos amans cofort,
		e non garda co fort,
		e per un nj per dos
	30	tortz no cessa·l perdos.
IV		Don’ab pretz gracïos
		—qu’en totz bes a ressort
		e non cura de sort
		ni no·l plai tracïos
	35	ni lunh mal no cossen,
		sitot sofre nossen—
		ay empreza d’amar,
		que·m fara dous d’amar;
		e dey l’esser comes,
	40	qu’ilh m’a d’amar comes.
V		En bon esper m’a mes
		—s’ieu sai mo mielhs triar
		e·l say gent embriar—
		selha que m’a trames
	45	sen et entendemen
		de bon aprendemen,
		que m’a d’alques destort;
		e fas comte d’estort,
		pus domn’ay qu’enten sos
	50	e motz, non es tensos.
VI		Dona, flors de deport,
		drecha via de port:
		plassa·us per vos chan sos
		e·n fassa mas chansos.
VII	55	Mos faitz e mas razos,
		dona, guide razos.