Mouzat, Jean. Les poèmes de Gaucelm Faidit. Troubadour du XIIe Siècle. Paris: A. G. Nizet, 1965

Code: 167,026=432,002=449,001a Auteur: Gaucelm Faidit , Savaric de Mauléon , Uc de la Bachalaria Genre: Partimen Numero: 51

Gaucelm, tres jocs enamoratz

I	1	Gaucelm, tres jocs enamoratz
		partisc a vos et a N’Hugon,
		e chascus prendetz lo plus bon,
		e laissatz me cal qe-us voillatz :
	5	Una dompn’ a tres prejadors,
		e destreing la tant lor amors
		qe, qan tuich trei li son denan,
		a chascun fai d’amor semblan :
		l’un esgard’ amorosamen,
	10	l’autr’ estreing la man dousamen,
		al tertz caucia-l pe rizen —
		Digatz a cal, pois aissi es,
		fai major amor de totz tres.
II		Seigner Savaric, ben sapchatz
	15	que l’amics receup plus gent don
		qe franchamen, ses cor fellon,
		es dels huoills plazens esgardatz ;
		del cor mou aqella dousors,
		per q’es cen tans majer honors ;
	20	de la man tener, dic aitan
		qe non li ten ni pro ni dan,
		c’aital plazer comunalmen
		fan dompnas per acuillimen ;
		e, del cauciar, non enten
	25	c’anc la dompn’ amor li fezes,
		ni-l deu per amor esser pres.
III		Gaucelm, vos dizetz so qe-us platz,
		for qe non mantenetz razon,
		q’en l’esgardar non conosc pron
	30	al amic, que vos razonatz ;
		e s’el i enten, es follors,
		c’uoill esgardon lui et aillors,
		e nuill autre poder non an —
		Mas qand la blancha mas ses gan
	35	estreing son amic dousamen,
		l’amors mou del cor e del sen ;
		e-N Savarics que part tan gen
		mantenga-l cauciar cortes
		del pe, q’ieu no-l mantenrai ges.
IV	40	N’Ugon, pois lo mieills me laissatz,
		mantenrai lo ses dir de non,
		don dic que-l cauciars que fon
		faitz del pe, fon fin’ amistatz
		celada dels lauzenjadors ;
	45	et par ben, pos aital socors
		pres l’amics rizen, chaucian,
		qe l’amors es ses tot engan ;
		e qui-l tener de la man pren
		per major amor fai nonsen ;
	50	e d’En Gaucelm, no m’es parven
		que l’esgart per meillor prezes,
		si, tan com ditz, d’amor saubes !
V		Seigner, vos que l’esgart blasmatz
		dels huoills e lor plazen faisson,
	55	non sabetz que messatgier son
		del cor, qe-ls hi a enviatz ?
		C’uoill descobron als amadors
		so que reten el cor paors,
		don totz los plazers d’amor fan ;
	60	e maintas vetz, rizen, gaban,
		caucia-l pe a mainta gen
		dompna, ses autr’ entendemen ;
		e N’Ugo manten faillimen,
		qe-l teners del man non es res,
VI	65	ni non cre q’anc d’amor mogues.
		Gaucelm, encontr’ Amor parlatz
		vos e-l seigner de Malleon,
		e pareis ben a la tensson
		qe-ls huoills, qe vos avetz triatz
	70	e que razonatz pelz meillors,
		an trahitz mains entendedors ;
		e, de la dompn’ ab cor truan,
		si-m cauciava-l pe un an,
		non auria mon cor gauzen ;
	75	e de la man es, ses conten,
		que l’estreigners val per un cen,
		car ja, si al cor non plagues
		l’amors, no-il agra-l man trames.
VII		Gaucelm, vencutz etz del conten,
	80	vos e N’Ugo, certanamen,
		e vuoill qe fassa-l jutgamen
		mos Gardacors, qe m’a conqes,
		e Na Maria on bons pretz es.
VIII		Seigner, vencutz non sui nien,
	85	et al jutgar er ben parven,
		per q’ieu vuoill que-i si’ eissamen
		Na Guillelma de Benauges,
		ab sos digz amoros cortes.
IX		Gaucelm, tant ai razon valen
	90	c’amdos vos fortz, e mi defen,
		e sai-n’una ab gai cors plazen
		en qe-l jutgamen fora mes,
		mas pron vei que n’i a de tres.