Mouzat, Jean. Les poèmes de Gaucelm Faidit. Troubadour du XIIe Siècle. Paris: A. G. Nizet, 1965

Code: 276,001 Auteur: Jordan de l'Isla de Venessi Genre: Canso Numero: 74

Longa sazon ai estat vas Amor

I	1	Longa sazon ai estat vas Amor
		humils e francs, et ai faich son coman
		en tot qant puosc ; et anc, per nuill affan
		q’ieu en sofris, ni per nuilla dolor
	5	de lieis amar, no-n parti mon coratge,
		a cui m’era rendutz de bon talen,
		tro q’ieu conuc en leis un fol usatge
		ab qe-m dechai, e m’a camjat mon sen.
II		Agut m’aura per leial servidor,
	10	mas tant la vei adonar ad engan,
		per que s’amors no mi platz derenan,
		nim pot far ben que ja m’agues sabor —
		e partrai m’en, c’aissi-m ven d’agradatge,
		puois ill se part de bon pretz eissamen,
	15	et er m’aillors tener autre viatge
		on restaure so que m’a faich perden.
III		Ben sai, si-m part de lieis ni-m vir aillor,
		que no-i l’er greu ni non s’o ten a dan,
		e si cuich eu saber e valer tan,
	20	c’aissi cum suoill enanssar sa lauzor,
		li sabria percassar son dampnatge —
		pero lais m’en per mon dreich chausimen,
		car assatz fai qui de mal seignoratge
		si sap partir ni loignar bonamen.
IV	25	En patz m’en part, mas qan cossir l’error
		e-l dan c’ai près e-l destric, lieis aman ;
		ni cum m’agra trobat ses cor truan
		qi-m feir a ben e-m tengra en doussor !
		no-m puosc mudar que no-m sia salvatge,
	30	mas si-m conort, c’auzit ai dir soven,
		c’a des pass’ om primiers per lo follatge,
		e pois taing ben c’om s’an reconoissen.
V		A, cum cuidiei fos dinz d’aital color
		cum aparec de foras per semblan !
	35	et enaissi cum ill a beutat gran
		e cum mais val gardes genseitz s’onor ;
		et enaissi cum es de bel estatge
		agues en si mais de retenemen ;
		et enaissi cum es d’ausor paratge
	40	contra son pretz temses far faillimen ;
VI		Ja non degra beutatz far son estatge
		ni remaner en dompna autramen,
		si non gardes s’onor e son paratge
		e non agues en si retenemen.