Mouzat, Jean. Les poèmes de Gaucelm Faidit. Troubadour du XIIe Siècle. Paris: A. G. Nizet, 1965

Code: 167,019 Auteur: Gaucelm Faidit Genre: Canso Numero: 56

Del gran golfe de mar

I	1	Del gran golfe de mar
		e dels enois dels portz,
		e dels perillos far,
		soi, merce Dieu, estortz !
	5	don posc dir e comdar
		qe mainta malanansa
		i hai suffert, e maint turmen !
		e pos a Dieu platz que torn m’en
		en Lemozi, ab cor jauzen,
	10	don parti ab pesansa,
		lo tornar e l’onransa
		li grazisc, pos el m’o cossen.
II		Ben dei Dieu mercejar,
		pos vol que, sans e fortz,
	15	puesc’ el païs tornar,
		on val mais uns paucs ortz,
		qe d’autra terr’ estar
		rics ab grau benanansa !
		qar sol li bel acuillimen,
	20	e-il onrat fag e-il dig plazen
		de nostra domn’ e-il prezen
		d’amorosa coindansa,
		e la doussa semblansa,
		val tot can autra terra ren.
III	25	Ar hai dreg de chantar,
		pos vei joi e deportz,
		solatz e domnejar,
		qar so es vostr’acortz
		e las font e-l riu clar
	30	fan m’al cor alegransa,
		prat e vergier, qar tot m’es gen !
		q’era non dopti mar ni ven,
		garbi, maïstre ni ponen,
		ni ma naus no-m balansa,
	35	ni no-m fai mais doptansa
		galea ni corsier corren.
IV		Qi, per Dieu gazaignar,
		pren d’aitals desconortz,
		ni per s’arma salvar,
	40	ben es dregz, non ges tortz ;
		mas cel qi, per raubar
		e per mal’ acordansa,
		vai per mar, on hom tan mal pren
		em pauc d’ora, s’aven soven
	45	qe, qan cuj’om pujar, deissen ;
		si c’ab desesperansa
		il laissa tot en lansa
		l’arm’ e lo cors, l’aur e l’argen !