Mouzat, Jean. Les poèmes de Gaucelm Faidit. Troubadour du XIIe Siècle. Paris: A. G. Nizet, 1965

Code: 167,025=016,016 Auteur: Gaucelm Faidit , Albertet Genre: Partimen Numero: 61

Gaucelm Faidit, eu vos deman 

I	1	Gaucelm Faidit, eu vos deman :
		cal crezetz que sion major,
		o li ben, o li mal d’amor ?
		e digatz m’en vostre semblan :
	5	qe-l bens es tant doutz e tant bos,
		e-l mals tant fers et angoissos,
		qu’en chascun podetz pro chausir
		razons, s’o voletz mantenir.
II		Albert, li maltraich son tant gran,
	10	e-il ben de tant fina sabor,
		greu trobaretz mais amador
		non anes el chausir doptan ;
		mas eu dic que-l bes amoros
		es majer que-l mals, per un dos,
	15	ad amic que sap gen servir,
		amar e celar e sofrir.
III		Gaucelm, ja non vos en creiran
		li conoisen entendedor,
		que vos e-il autre trobador
	20	vei q’ades vos n’anatz claman ;
		e pois eu auch dire a vos
		et als autres, en lor chanssos,
		c’anc d’amor no-us pogetz gauzir —
		on son aqist ben que-us auch dir ?
IV	25	Albert, maint fin leial aman
		ant faich per descudar clamor,
		q’ieu vei qu’il prendon grand honor
		e gran ben, jazen e baisan ;
		e pois es en amor razos
	30	qe-ls mals deu esser bes e pros,
		e tot qant en pot avenir
		deu drutz en ben prendr’ e grazir.
V		Gaucelm, cil q’amon ab engan
		no sentont los maltraitz d’amor,
	35	ni hom non pot gens gran valor
		aver ses pen’ e ses affan,
		ni nuills hom non pot esser pros
		ses maltraich ni far messios,
		et Amor fetz Andrieu morir,
	40	c’anc bens que fos no-l poc garir.
VI		Albert, tuich li maltraich e-il dan
		perdon lor forss’ e lor vigor,
		e tornon en doussa sabor,
		lai o nuils hom se trai enan ;
	45	que l’amics, pois que er joios,
		non er membrantz qu’anc iratz fos ;
		aissi fa-l bens lo mal fugir :
		doncs es el majer, ses faillir.
VII		Gaucelm Faidit, nostra tenssos
	50	an’ a la comtessa, q’es pros
		d’Engolesme, qe-n sabra dir
		lo ben e-l mal, e-l mieils chausir.
VIII		Albert, be-m plai que la razos
		an’ a lieis q’es valens e pros ;
		mas nostra terra fai delir,
		car non vol de Franssa venir.