Mouzat, Jean. Les poèmes de Gaucelm Faidit. Troubadour du XIIe Siècle. Paris: A. G. Nizet, 1965

Code: 167,018 Auteur: Gaucelm Faidit Genre: Canso Numero: 62

De faire chansso

I	1	De faire chansso
		ai estat gran sazo,
		per atendre razo
		que fos plazens e gaia,
	5	don m’a faich ric do
		Amors, e taing qe-m plaia ;
		car conosc e sai
		que bon atendre fai ;
		qu’era, mal grat que n’aia,
	10	cella don non ai
		cor que ja la prec mai,
		ai trobat qe-m ten gai.
II		E, pois tant be-m vai
		qe partitz sui de lai,
	15	ben coven e s’eschai
		q’ieu grazisc’ e retraia
		l’onor, que m’atrai,
		ab franquesa veraia,
		vas tal dompn’ Amors,
	20	ont es pretz e valors ;
		per qu’es fols qui s’esmaia,
		qu’i vis las errors
		e-ls dans q’ai pres aillors,
		et ar ve cum sui sors.
III	25	Doncs, dic q’es follors
		qui reign’ ab mals seignors
		don benfaitz ni socors
		no-il veingna ni l’eschaia ;
		anz es grans honors
	30	e grans sens qu’om s’atraia
		lai on sap e ve
		q’a franques’ e merce —
		que-l bos seigner s’essaia
		ades de far be,
	35	e-l malvatz non val re ;
		anz dechai so que te.
IV		Aissi sai e cre
		que cuidet far de me
		cel que non a ab se
	40	mais poder qe-m dechaia,
		que tals mi rete
		de sa prezo savaia,
		q’es plus bell’assatz
		e sos pretz plus prezatz —
	45	ab que-l don no m’estraia,
		qe-m mandet en patz,
		sos valens cors honratz,
		don chant e m’assolatz.
V		E veira-m viatz,
	50	s’a mon Bel Thesaur platz,
		de cui es Monferratz,
		on jois e pretz s’apaia ;
		e, si-m soi tardatz
		de leis vezer, no-il chaia
	55	en tant de pessar,
		qe-m vuoill’ ochaisonar,
		que la paors m’esglaia
		tant tem son cors car ;
		q’om non pot ben amar
	60	leialmen ses doptar !
VI		Per qe-il vuoill mostrar
		que mais fai aprezar
		qui sap, ses lonc prejar,
		anz c’om en crit ni-n braia,
	65	son joi conquistar ;
		car qui vol q’om mal traia
		lonc temps en perdo
		non a larc cor ni pro ;
		mas qui leu don’ e paia,
	70	ses trop dir de no,
		leu n’a rie guizardo
		ab plazer bel e bo.
VII		Ma gaia chanso,
		vueilh q’en des ochaizo
	75	a ’N Ric de Joi part Blaia,
		q’es gabatz per bo,
		q’es gabatz per bo,
		q’ieu n’ai lonja sazo
		estat senes razo.