Mouzat, Jean. Les poèmes de Gaucelm Faidit. Troubadour du XIIe Siècle. Paris: A. G. Nizet, 1965

Code: 167,056 Auteur: Gaucelm Faidit Genre: Canso Numero: 65

S’om pogues partir son voler

I	1	S’om pogues partir son voler
		de so don plus a-l cor volon,
		can no-n pot jauzimen vezer,
		l’uns dels grans sens fora del mon ;
	5	car, de las grans foudatz que-i son,
		es be la maier, qui s’enten
		segre son dan ad escien,
		car doblamen
		fai faillimen —
	10	Pero greu er fis amics drutz privatz
		si-l bes e-l mals e-l jois e-l dan no-il platz.
II		Tot aisso mi vengr’ a plazer,
		si tot sui el maltraich prion,
		s’Amors mi volgues tant valer
	15	que l’amoros cors deziron
		mi pagues d’un joi jauzion,
		qu’assatz par que for’ avinen
		qez agues del ben qui-l mal sen ;
		q’ie-n preira cen
	20	malstraitz sofren,
		e fora-m jois e plazers mout onratz,
		s’apres cen mals en fos d’un joi pagatz.
III		Mas ieu lo pert si-l ben esper,
		cum cel q’al jogar se confon,
	25	qe jog’ e non pot joc aver,
		e non sent fam ni sel ni son —
		Atressi m’es pojat el fron
		et intrat el cor, follamen,
		que, qan plus pert, mais i aten
	30	cobrar soven,
		tant ai fol sen !
		E, l’atendres non es res mas foudatz,
		car a mon dan sui trop enamoratz.
IV		Tuich trop son mal, q’ieu-l sai en ver,
	35	qe-l aut pojars, don chascus gron,
		q’ieu fezi, m’a faich bas chazer —
		e pero pojei tant amon
		que penre cuidei l’aurion,
		qu’om non pot penre ab ren viven
	40	de tant fort manieira-is defen ;
		pero temen,
		et humilmen,
		o comensei com hom d’Amor forssatz,
		don non m’er mal, si n’er’ a dreig jutjatz !
V	45	E car res no-m pot pro tener
		ab lieis don muor et art e fon,
		un sen fauc, qu’ab forsat poder
		fug de lieis vezer e-m rescon —
		mas mos sens no vei que m’aon,
	50	q’ieu muor qand no vei son cors gen
		e qand lo vei muor eissamen,
		qe nuill parven
		no-m fai plazen ;
		anz qand l’esgart esgard’ ad autre latz,
	55	que no m’acuoill ni-m vol aver solatz.
VI		Vas mi donz sui de franc saber,
		plus humils d’un frair de Granmon,
		et ill m’es d’orgoillos parer
		si que, qan la prec, no-m respon —
	60	Un aventur’ ai, no sai d’on,
		q’anc re non amei coralmen
		c’orguoill no-m mostres mantenen,
		c’aital tormen
		bran e cozen
	65	mi mostr’ Amors, a cui me sui donatz ;
		aquest m’es totz lo guizerdons e-l gratz !
VII		Si be-m sui en greu pessamen,
		cum cel qe merce non aten,
		chanssos, vai t’en
	70	tost e corren
		dir mon Thesaur, de cui es Monferratz,
		q’ieu-l qier perdon car lai non sui tornatz.
VIII		Bels Diamans, be-m plai vostra beutatz,
		e ben lo pretz on chascun jorn pojatz.