Mouzat, Jean. Les poèmes de Gaucelm Faidit. Troubadour du XIIe Siècle. Paris: A. G. Nizet, 1965

Code: 165,002=052,003 Auteur: Bernart , Gaucelm Faidit Genre: Tenso Numero: 67

Gausselm, no-m puesc estener

I	1	— Gausselm, no-m puesc estener
		c’ab vos, iratz, no contenda ;
		que talan ai qu’ieu defenda
		las donas a mon poder,
	5	que vos aug descaptener ;
		c’una-m ren cortez’ esmenda,
		que m’avia fag doler ;
		per qu’ieu, en lor captener,
		tanh que mos bels ditz despenda.
II	10	— Bernart, be sapchatz de ver,
		que non vezem que ben prenda
		a nulh qu’en dona s’entenda —
		per qu’ie-us fatz enans saber
		que fols vos fassatz tener,
	15	ni qu’ela s’amor vos venda,
		e no-i metatz vostr’ aver
		que ben poiriatz dechazer
		s’aviatz mil marcx de renda !
III		— Gauselm, no-us detz plus paor
	20	de mi qu’ieu eis, ni temensa ;
		qu’en tal don’ ai m’entendensa,
		cui sierf e prec et aor,
		e sap valer part valor ;
		mas vos i fatz gran falhensa
	25	car descaptenetz amor,
		c’Amors melhura-l melhor,
		e l’aut auss’ e -l gensor gensa.
IV		— Bernart, per so n’ai temor,
		car conosc la meins valensa
	30	qu’elas, ab bela parvensa,
		fan lo for del brezador
		e tornon hom en folor ;
		e quan l’an en lor tenensa
		— segon que dizon l’auctor —
	35	meton l’en tan gran error
		don ja non aura guirensa.
V		— Gausselm, e com auzatz dir
		q’enjans si’ en amor fina,
		vas cui totz lo mons aclina ?
	40	qu’ela fai gent esbaudir
		l’irat, e-l paubr’ enrequir,
		ab una cuenda metzina —
		que ja pueis, al meu albir,
		hom no pot dolor sentir
	45	mas ela-l sia vezina.
VI		— Bernart, gardatz de traïr
		d’esta vostr’ amor frairina,
		en cui malvestatz s’aizina,
		mas si-l voletz ben servir
	50	ni sos talans ademplir,
		corba-ill be soven l’esquina !
		e gardatz vos, al partir,
		que no-us puesca escarnir
		qu’ela sap trop de rapina.
VII	55	— Gauselm, en vos non taïna
		vilas motz ni lagz a dir,
		per qu’ieu vuelh aisi fenir
		ma razo, qu’es bon’ e fina.
VIII		— Bernart, anc d’amor canina
	60	no vim nuill home jauzir,
		e si no-us voletz gequir
		tira-us lo cat per l’esquina.