Shepard, William P.; Chambers, Frank M.. The poems of Aimeric de Peguilhan. Evanston: Northwestern University Press, 1950

[CdT en procés d'incorporació]

Code: 010,003=016,003 Auteur: Aimeric de Peguillan , Albertet Genre: Tenso Numero: 3

N’Albertz, chausetz al vostre sen

I	1	N’Albertz, chausetz al vostre sen
		D’un amic qu’enquier per amor
		Doas domnas d’una valor;
		E l’un’ ama lui e·ill cosen
	5	Lo plus, ab que de l’autra·s lais
		Qu’el ama·l doble meillz e mais,
		Et aquella no·l vol amar ni·l deigna.
		Digatz ab cal d’ambas l’es mielz que·s teingna.
II		N’Aimerics, pauc a d’ensien
	10	Qui no·n sap triar lo meillor.
		A guissa de fin amador
		Voill amar celei coralmen
		De cui anc mos cors no s’estrais;
		E vos voill c’amez en biais,
	15	Qu’eu non ai cor que fals guizardon preingna,
		Anz voill servir tan c’al ric joi aveingna.
III		N’Albertz, ben sai que·l conoissen
		Tendran e·l bon entendedor
		Vostra rason per sordeior,
	20	C’ab mej’ amor sai qu’es plus gen
		C’om baizan jazen sia gais
		C’ab tota sospir e pantais.
		Mais pretz lo frug on ab las mans ateingna
		C’aisel qu’es autz, on lansar mi coveingna.
IV	25	N’Aimerics, ges no m’es parven
		Que·us entendatz en gran honor;
		E no s’eschai a preguador
		C’aissi s’an camjan ni volven,
		Anz deu esser fis e verais.
	30	E no voill c’aitals frugs m’engrais;
		Mas voill esser totz temps secs plus que leingna
		Que manje frug de que talanz no·m veingna.
V		N’Albertz, quan son comunalmen
		D’engal beutat e de lausor,
	35	Fas a lei de bon partidor
		Que·ls mals vos las e·ls bens eu pren.
		Qu’als bes taing c’om s’afraingn’ e·s bais
		E fuia·ls mals a grant eslais;
		Qu’anz que s’arda ni que trop s’escompreingna
	40	Deu om gardar del foc ab que l’esteingna.
VI		N’Aimerics, li galiamen
		Que fan li fals e·il trichador
		An tornat domnei en error;
		Et a vos non es d’avinen
	45	Que·us dejatz cargar de tal fais,
		Qu’anc fis amics sidonz no trais;
		Et eu sui sel cui fin’ Amors enseingna
		Que leialmen ves ma domna·m capteingna.
VII		N’ Albertz, car es de beutat rais
	50	Na Biatritz d’Est, on pretz nais,
		Voill d’aquest plaig juge so que·s coveingna;
		Mas eu cre ben que ma rason manteingna.
VII		N’Aimerics, a N’Emilla lais
		De Ravena, c’ades val mais
	55	En tot bon fag c’a pro domna coveingna,
		Lo jujamen, e c’ab lo dreg s’en teingna.