Shepard, William P.; Chambers, Frank M.. The poems of Aimeric de Peguilhan. Evanston: Northwestern University Press, 1950

[CdT en procés d'incorporació]

Code: 010,004 Auteur: Aimeric de Peguillan Genre: Canso Numero: 4

A ley de folh camjador

I	1	A ley de folh camjador
		Ai camjat mal per pejor,
		E so son doas foldatz.
		Pero si son tan cenatz
	5	Que ben conosc ma folor.
		Si mos sens no m’en castia
		E sec ades ma folhia,
		No m’en deu hom planher, anz deu plazer
		Mos dans, pois tan ponh en mi deschazer.
	10	Quar s’ieu falhi al major,
		Pus ai falhit al menor;
		Per que·l falhirs es doblatz,
		O c’es endreg Dieu peccatz,
		E blasmes endreg lauzor,
	15	E crims endreg cortezia,
		E vergonha endreg d’amia
		E dans endreg recebr’ autruy ayer:
		Doncs si deu selh guardar que deu valer.
III		E doncs diguatz mi, senhor!
	20	Que falh vers un trobador
		Qu’es conogutz e prezatz
		E pels melhors enansatz,
		S’ilh l’aunis ni·l contracor?
		D’autr’ afar quo·s portaria?
	25	Leu devinar o faria:
		Qu’aisselh’ honra so que deu vil tener
		E so ten vil qu’onrar deu e temer.
IV		Be farai castic forsor,
		Si non cre castiador;
	30	Mas si bendig non amatz
		Ni vergonha no duptatz,
		Cum conoisseretz honor,
		Ni castiars que valria?
		Aitan me mescabaria,
	35	Quar sa cresma pert qui·lh met e·l lezer
		Qui filh d’aze bateja jorn ni ser.
V		Aissi mezeis, non alhor,
		M’en rancur en fatz d’amor,
		Que lo vils a croys mercatz
	40	M’en vensera miels assatz,
		Que·m fassa tal dezonor,
		Qu’ieu ges no m’en venjaria
		Tan fort, neys s’ieu l’aucizia.
		Vida·l don Dieus e·l cresca son saber!
	45	E no·l pot om piegz orar ni voler.
VI		A’N Rainier fas de Val Cortes saber
		Socors non es que de mos tratz esper.