Oroz Arizcuren, Francisco J. La lírica religiosa en la literatura provenzal antigua. Pamplona: Excma. Diputación Foral de Navarra - Institución Príncipe de Viana, 1972.

Edición crítica, traducción, notas y glosario. Versión revisada para Corpus des Troubadours, 2011.

Code: 234,002 Auteur: Guilhem de Saint Leidier Genre: Chanson religieuse Numero: XX

Aissi cum a sas faissos

I		Aissi cum a sas faissos
		Dieus, del tot creaire,
		fetz lo premier paire,
		fon pueys lo reys glorïos
	5	hom carnals, de peccatz blos,
		natz de verge maire;
		fo natz atressi quo nos,
		per so que ses tot’erransa
		fos crezut qu’a sa semblansa
	10	nos fetz lo francs senher bos.
II		Mout hi a d’autras razos,
		qu’ieu non dic ni·sclaire,
		per que·l guovernaire
		de tot quant es sus ni ios
	15	volc que fos faitz ses pairos
		lo premiers peccaire.
		Mas tot quan vol nos es pros,
		so crezem, ei, am fizansa,
		e·ns mostret per demostransa
	20	qu’era Dieus totz poderos.
III		Tant es cars e vertuos
		en tot son afaire
		e tan de bonaire
		lo francs reys meravelhos,
	25	per que verayas razos
		pot hom ben retraire,
		qu’ab devinas orazos
		en la preveyral sagransa
		torna lo pas, ses duptansa,
	30	sa carns que pres mort en cros.
IV		Doncs, per qu’es nulhs hom duptos
		que·l verays salvaire
		non pogues filh traire
		d’un verge cors precïos,
	35	ses assag que fagz no·y fos
		d’ome? Be·s poc faire,
		pus tost que quant us limos
		de terra venc en mudansa
		d’ome, per forsa d’obransa
	40	del senhor pïatados.
V		Ma fes e m’entencïos
		me valh’ e·l vejaire
		que·m fan enan traire
		los fagz de Dieu e·ls sermos;
	45	qu’ieu conosc ben qu’aondos
		no·y suy, mas estraire
		no m’en puesc: tan volentos
		suy de dir sa gran honransa.
		E si ey fatz autracujansa
	50	valha mi lo sieus perdos.
VI		Vers Dieus, faitz mi tan d’onransa
		que vostra belha semblansa
		veya m’arma pres de vos.