Wolf, George; Rosenstein, Roy. The Poetry of Cercamon and Jaufre Rudel. New York & London: Garland Publishing, Inc, 1983

[CdT en procés d'incorporació]

Code: 112,003 Auteur: Cercamon Genre: Canso Numero: 5

Per fin’amor m’esjauzira

I	1	Per fin’amor m’esjauzira,
		tant quant fai chaut ni s’esfrezis;
		toz tems serai vas lei aclis,
		mas non puosc saber enqera
	5	si poirai ab joi remaner,
		o·m voldra per seu retener
		cella cui mos cors dezira.
II		Seignors e dompnas gerpira
		s’a lei plagues q’eu li servis;
	10	e qi·m diria m’en partis
		faria·m morir desera,
		q’en autra non ai mon esper,
		nuoit ni jorn, ni maitin ni ser,
		ni d’als mos cors non consira.
III	15	Ges tant leu no l’enqesira
		s’eu sabes cant greu s’afranquis;
		anc res no fo no s’umelis
		vas amor; mas ill n’es fera;
		e domna non pot ren valer,
	20	per riqessa ni per poder,
		se joi d’amor no l’aspira.
IV		Ja de sos pes no·m partira
		s’il plagues ni m’o consentis,
		o sol que d’aitant m’enrequis
	25	que dixes que ma domna era,
		e del plus fos al seu placer,
		de la menzonja o del ver,
		c’ab sol son diz m’enrequira.
V		Entre joi remaing et ira
	30	ades quant denan lei partis,
		q’anc pois no la vi q’ela·m dis
		qe si l’ames, mi amera;
		mas eu no sai lo seu voler;
		mas ben pot ma domna saber
	35	q eu morrai si ganre·m tira.
VI		Gencer en est mon no·s mira,
		bell’e blancha plus c’us hermis,
		plus fresca que rosa ne lis;
		ren als no m’en desespera;
	40	hai! si poirai l’ora veder
		q’eu puosca pres de llei jacer!
		eu non, qar vas mi no·s vira.
VII		Toz mos talenz m’aëmplira
		ma domna, sol d’un bais m’aizis,
	45	q’en guerrejera mos vezis,
		e fora larcs, e donera,
		e·m fera grazir e temer,
		e mos enemics bas chader,
		e tengra·l meu e·l garnira.
VIII	50	E pot ben ma domna saber
		que ja nulz hom de mon poder
		de meillor cor no·ill servira.
IX		E si·m fezes tant de placer
		qe·m laisses pres de si jaser,
		ja d’aquest mal non morira.