Kolsen, Adolf. Beiträge zur Altprovenzalischen Lyrik (42 Erstmalig Bearbeitete Dichtungen). Firenze: Leo S.Olschki, 1939

Code: 434a,058 Auteur: Serveri de Girona Genre: Canso Numero: 2

Si com l'ayga tra peitz que res que sia

I	1	Si com l'ayga tra peitz que res que sia
		Trai·l mals d'amor sobre tot los amanz ;
		Car cil cuy am me frayn covens e mans
		E·m destreyn tan qu'eu desir que m'aucia.
	5	Que·l mals que·m fay me fen e·m frayn e·m mort ;
		Mas fara·m dreit, ço ditz, can m'aura mort,
		De ma vida, que·m fay penan despendre
		Axi com cel qui·l pendut fa despendre.
II		Si·l plazia, merce demandaria,
	10	Car Merces es humils e durs demanz.
		C'ab merce vey amanz guerir de manz
		Greus mals e say que sens dernan daria
		Sos gentils cors a me joy e deport,
		Si sabia lo mal e·l faix que port.
	15	Car fin'amors, qui·m fay en leys entendre,
		Me fay penan languen merce atendre
III		Si que per mal, qu'en sofris, no·m partria
		De leys servir e far totz sos comanz.
		« Fay tan sevals, sol c'un bays li comanz.
	20	Pus amors t'a fait d'amar, se·s partria,
		Con mays no puc ! » Qu'en amor vay per tort
		Dreitz e per pris cel c'om te per estort,
		Ez eu tem tan menzcabar e reprendre,
		Re no·il coman ne aus del seu re prendre.
IV	25	Si sui destreitz que ora tenc per dia
		E dia m'es adreitz de mes semblans,
		Car leys no vey, las, e no m'es semblans
		E si·l vezer ne·l gay solatz perdia
		De la bela, qu'es la gençer que·s tort,
	30	Leu auria de tot l'als fait acort !
		Car qui pert ço que pus am'escuxendre,
		No·l cal per l'als ; car no pot pus dexendre !
V		Si per valor tan de merce m'avia,
		Car es gentils, plasenz, cuynd'e prezans,
	35	Que vis co·m fay languir e·m te pres anz
		C'axi·s muris, per leys languen, ma via
		Mal aguir no temeria ne sort,
		E s'il no·m val, ja Deus no·m vaylla ! Hort,
		Prat ne jardi no·m podon vid'estendre
	40	Un jorn ; tan vey la mort près mi destendre.
VI		Can Cardona vey, ay gauig e deport ;
		Qu'el mon no say loc de pla ne de port
		Ab mays valor, per qu'eu vuyll lay atendre
		E Sobrepretz, car hom no·1 pot geyn tendre.
VII	45	L'enfans Peyre ditz que troban acort,
		E pus o ditz il, eu no·y voyl recort
		C'om deu guardar fi a grans faitz empendre,
		E qui·s mendar no sab, no deu rependre !