Kolsen, Adolf. Beiträge zur Altprovenzalischen Lyrik (42 Erstmalig Bearbeitete Dichtungen). Firenze: Leo S.Olschki, 1939

Code: 434a,051 Auteur: Serveri de Girona Genre: Estampida Numero: 7

Plus fis amayre no nasc de mayre

I	1	Plus fis amayre     No nasc de mayre
		De mi c' umils semblança
		De la belayre,    Que·s mir sotz l'ayre,
		Me fay ric d'esperança.
	5	Doncs, ses estrayre,     Fay lay retrayre
		Chantan, en loc de dança,
		Ans qu'eu repayre     En son repayre,
		Salutz ab DESIRANÇA.
II		Pero de mi a    Bem pauc m'amia
	10	De cur'e de membrança ;
		Car no m'envia     Ço don m'avia
		Dada plasen fiança.
		Don faz greu via     E gart la via
		Tan que lo·m n'an pesança ;
	15	Car tan languia,     E s'il no·m guia,
		Aucira·m DESIRANÇA.
III		Que la dezire     Tan que·m n'azire
		C'ar m'es loyn sa cuyndança.
		Ab greu cossire     Mi vol aucire
	20	Desirs qui·m desenança,
		Sofren martire ;     Pero no·m tire
		D'amar, car, ses dubtança,
		Leyals servire     Creys, pus no·s vire
		A sidons DESIRANÇA.
IV	25	Vas leys sopleva,     On pretz s'apleya,
		Est las c'ab laus l'enança.
		Say qu'en despleya     Gen e·l son pleya
		Entrels bos a s'onrança
		E par que·l deya,     Pus no so drey a
	30	D'amar, dar benenança.
		C'altra que veya    No·l fa enveya;
		Tan n'a gran DESIRANÇA.
V		Ja deus no m'aya,     S'el mon remaya,
		Que m'aport alegrança,
	35	Tro vas leys vaya,     Don gen savaya
		Tem ; que d'altr'amistança
		No·s cuig que·m playa ;     Tan gen me playa
		Ab douz esgar, que·m lança !
		Can que·m deschaya,     Crey que·m n'eschaya
	40	Joys don ay DESIRANÇA.
VI		Qui que s'atraya    Vas pretz, no·l traya
		En van ; ab Cartz s'enança
		E crey qu'i aya    Sobrepretz jaya,
		Don fatz la DESIRANÇA.
VII	45	No·s cuig m'estraya     Qu'eu no retraya
		Del rey per ço honrança
		En Jacme. Playa     Totz cels, cuy playa
		Tortz can dreigs, DESIRANÇA.