Kolsen, Adolf. Beiträge zur Altprovenzalischen Lyrik (42 Erstmalig Bearbeitete Dichtungen). Firenze: Leo S.Olschki, 1939

Code: 434a,021 Auteur: Serveri de Girona Genre: Sirventes Numero: 12

En lors chantars dizon man trobador

I	1	En lors chantars dizon man trobador
		C'Amors los te destreitz e malenanz.
		Mi no destreyn Amors n'en soy clamans ;
		Ans me fay mays que nuylla res d'onor.
	5	Mas sobrazautz mi fay mal e·m destreyn
		D'un'avinen ab bel gentil capteyn.
II		Nuyll mal no·m sen ne suspir per Amor,
		Ans viu d'Amor joyos e benenans ;
		C'amar mi fay tal qu'es cuynd'e presanz
	10	E de domney cims, ab vera lauzor.
		Mas, car d'azaut se vest e·s li' e·s ceyn,
		M'en asaut tan que vas la mort m'enpeyn.
III		D'Amor no·m luyn ; ans n'ay douça sabor
		Qu'en leys repaus, on pus trac greus affans.
	15	Ela·m fay fi, sobre totz los amanz,
		De tal qui val sobre tota valor.
		Mas que·m faray, c'a viure no say geyn,
		Car sos azautz ab greu turmen m'estreyn ?
IV		Nuylls homs d'Amor no deu fayre clamor ;
	20	Que·ls pus braus fa humils e merceyanz
		E·ls escas larcs, cortes e gen parlanz
		E vol qu'eu serv'humilmen la gençor.
		Mas tan d'asaut l'a dat Deus qu'eu m'en seyn ;
		Car sol un pauc non a d'estas qu'esteyn.
V	25	S'Amors non fos, non sentira douçor
		Ne fora fis ne·m gardera d'enjanz
		Ne de vils ditz ne de faitz malestanz,
		Per c'ay razo c'Amor lau e onor.
		Mas ges d'asaut endreit lauzar no·m deyn ;
	30	Car d'azaut ve lo grans mals, qu'eu sosteyn !
VI		Domna dels Cartz e Sobrepretz, capteyn
		Faitz gen, d'azaut luynan de tot mal geyn.
		Reys en Peyre, no cal c'om vos enseyn ;
		Qu'el mon non a nuyl rey, tan asaut reyn.