Oroz Arizcuren, Francisco J. La lírica religiosa en la literatura provenzal antigua. Pamplona: Excma. Diputación Foral de Navarra - Institución Príncipe de Viana, 1972.

Edición crítica, traducción, notas y glosario. Versión revisada para Corpus des Troubadours, 2011.

Code: 174,009 Auteur: Gavaudan Genre: Vers (Chanson religieuse) Numero: XVII

Patz passïen ven del senhor

I		Patz passïen ven del senhor
		que per nos pres carn e moric;
		volc nos rezemer del sieu sanc,
		que·l fossem ver, fizel amic.
	5	Per so ia us non se n’estanc
		que usquecx vas luy non corra;
		que Dieus nos dona tal conort
		qu’el segle fals, falhit e mort
		nos mostra patz per sa doussor,
	10	que fa als bos los mals iauzir
		e·n patz ab patz patz obezir.
II		Per aquesta n’aurem maior
		patz, e vullatz qu’om vo’n prezic:
		ges non es ni er ni fon anc
	15	en ergulhos cor fellon, ric.
		Per qu’ieu sospir soven e planc
		quar no pessam pus abora
		q’us a l’altre no fezes tort
		ni agues ira ni desconort,
	20	mas fezes l’us a l’autr’amor;
		e cum pocsem a Dieu servir,
		quez elh nos denhe aculhir.
III		Regart deu aver e paor
		qui sap so qu’elh per nos suffric;
	25	vol que sïam humil e franc,
		perdonem a nostr’enemic,
		per so que de luy no·ns aranc
		peccatz que fort bram’ e plora
		quar li premier li son estort;
	30	non y a un tan gran nj fort
		—si ca layns— qu’ab gran dolor
		no·l fasson ardre e blezir
		selhs que fan peccar e falhir.
IV		A nulh home no fan honor,
	35	ni de lur obra non iauzic
		que no·l tornon d’aut bas el fanc,
		si co feiro·l premier antic;
		e ja no cug traspas ni manc,
		tart o temps, qu’a mala hora,
	40	qui dïable siec, non l’aport.
		De cobezeza·ns planton ort,
		de sobre totz mals lo peior;
		per que·ns podem greu d’elhs partir,
		qui ben no s’en sap escrimir.
V	45	Peccatz a tan dossa sabor
		per que Adamz lo pom trazic;
		del dreg iust fey fals, clop e ranc
		cobezeza, qu’el ne partic;
		qu’elh era assis en tal banc
	50	ia no saupra mals que·s fora,
		et a donat estranh deport
		ir’e trebalh e desconort
		a selhs qu’intran al bollidor,
		don iamais non poiran yssir:
	55	pensem nos quo·y poirem guerir.
VI		Sans Pauls dis: ‘pus temps nos secor,
		ia us de ben a far no·s tric;
		qu’el sieu sant clar paradis blanc
		Jhesucrist, que anc non mentic,
	60	nos apella enans que·l tanc.
		[ . . . . . . . . . . . . . . .
		. . . . . . . . . . . . . . . . . . . .
		. . . . . . . . . . . . . . . . . . . ]
		Corram lai on tug li doctor
	65	s’acordon que·y podem venir
		ab be far e ab mal gequir.
VII		Trichat seran li trichador,
		que anc mal per pieitz non guequic;
		no·y aura riu, vouta ni ranc
	70	al perjur fals qu’a fe falhic
		que denan luy no s’empalanc,
		ni engans que no·l secorra
		selh e·l san. Folhs, quar a son tort
		del dïable, quar ab sa sort
	75	lo n’a portat a deshonor,
		que anc no·l laisset repentir
		en vida ni quan dec murir.
VIII		Dombredieu prec yeu et ador,
		qu’elh nos lais el sieu renc venir,
	80	ab sos angils cans novels dir.
IX		Cal comte Raimon val honor
		e forsa [pro] per enantir
		pretz, en que totz le mons se mir.
X		Comte, rey et emperador
	85	avem luy per pretz enardir,
		ab patz enantir et sofrir.