Kolsen, Adolf. Beiträge zur Altprovenzalischen Lyrik (42 Erstmalig Bearbeitete Dichtungen). Firenze: Leo S.Olschki, 1939

Code: 434a,033 Auteur: Serveri de Girona Genre: Sirventes Numero: 14

Mon chan comenz d'ira mesclad'ab gaug

I	1	Mon chan comenz d'ira mesclad'ab GAUG
		Per leys, on mis ab son conseyll m'ententa ;
		Car m'es semblan que de sos ditz me MENTA
		E paus hi motz biays, c'a leys dir AUG.
	5	Mas can sos pretz es ples, pros, mantengutz
		E jays fora, s'il no fos confondutz,
		Cuya·m aucir per fals ditz non - degutz.
II		Plasenz domna, de la brancha del GAUG,
		Que·m des, no·us platz c'oymays douçors ensenta ;
	10	Ans la m'avetz cambïada per MENTA,
		Per que·m pre menz tot ço que vey e AUG,
		E si no·us platz que·m sia·l joys rendutz
		Vertz e floritz, no voyll altras salutz ;
		Car no·m platz rams, pus es secs e batutz.
III	15	Amor, aduit m'aviatz mais lo GAUG,
		Per que·l camjars mon fin cor me turmenta.
		Be faitz semblan qu'en l'ort vostr'a pro MENTA,
		Per que m'azir tot quant vey e dir AUG.
		Si be·us avetz pel blon d'aur, qui gen lutz,
	20	Bel fron, clars oylls, douz ris, tortz es sabutz,
		S'aucietz mi, qui·us soy davant vengutz.
IV		Si·m mesclassetz de salvia el GAUG,
		Salvatz fora qui tol, fals do presenta.
		Ans m'auriatz dat un gran faix de MENTA
	25	C'una fuylla de vertat, segons c'AUG.
		Que·l gauigs m'era de tal guisa cregutz,
		No cuyava nuyll temps esser vencutz
		Per marrimen, don er viu esperdutz.
V		Flors de malva mi mescles entrel GAUG,
	30	Per que no voyll que siatz ma parenta.
		Ja no agues en tot lo segle MENTA ;
		Car menta·m fay descreyre tot cant AUG.
		Si tot beutatz ab pretz laus vos adutz
		E Deus en vos mes totas sas vertutz,
	35	Can vos formet, no·m sia·l gaugs perdutz !
VI		Tora volgra me mesclesetz el GAUG
		Que tost moris sens far lonja contenta.
		No say jardi ni ort, pus y vis MENTA,
		Rosa ne lis m'i plagues per ço c'AUG.
	40	Pero el gauig jatz me si irascutz
		Metray celan, si tot m'es car vendutz,
		Celiandre pels cels dels fais menutz.
VII		Totz ortolas volgra fos cecs o muts,
		Qui en son ort te menta ne l'adutz ;
	45	Car per menta es totz lo mons perdutz.
VIII		De Sobrepretz non aug mans ne salutz
		Ne·ls Cartz no vey, per que viu esperdutz,
		E per lo rey, car çay non es vengutz.