Kolsen, Adolf. Beiträge zur Altprovenzalischen Lyrik (42 Erstmalig Bearbeitete Dichtungen). Firenze: Leo S.Olschki, 1939

Code: 434a,074 Auteur: Serveri de Girona Genre: Sirventes Numero: 17

Trop m'enueg d'en cortz anar

I	1	Trop m'enueg d'en cortz anar
		Et de juglaria
		E de porters sopleyar
		E de vilania
	5	Sofrir e menar
		E car lo segles cambia
		Que tals sol donar
		C'ab son grat eras tolria.
II		Mal m'es dels malvatz lauzar,
	10	Don mal dir poria,
		E peitz dels valens blasmar;
		Mas hom no volria
		En cort escoltar
		Ver dizen, si no mentia,
	15	Per qu'en volgr'estar,
		Si·l reys me des altra via.
III		Plazen dic aug mespresar
		Mantas vetz lo dia
		E vey los rics vils honrar
	20	Per lor manentia
		E·ls francs dezonrar,
		Don me creys ir'e feunia,
		E ay a cantar
		Tal vetz que plorar deuria.
IV	25	Tot ayço·m deu enujar
		E — mays s'i dezia ? —
		Can vey donas galiar
		E c'om las galiar
		E can vey tornar
	30	Amor enjan e falsia.
		Com uey posc trobar,
		Pus se vendet cortezia ?
V		Si·l reys me dav'a manjar,
		Ja mays no faria
	35	Sirventes de mal mesclar ;
		Enans m'auziria
		Pulir e limar
		Chantars, ab que lauzaria
		Sidons, qu'es sens par,
	40	E ja del lau no mentria !
VI		Reys, qui viu sens par
		De pretz, no crey que ja·m dia
		De no de manjar ;
		Qu'eu say que mal l'estaria.
VII	45	Na Sobrepretz, car
		Valetz mays c'autra que sia.
		Vos lauzi e Car-
		dona no deslauzaria.
VIII		L'enfans Peyre par
	50	Qu' empar pretz e cortezia !