Wolf, George; Rosenstein, Roy. The Poetry of Cercamon and Jaufre Rudel. New York & London: Garland Publishing, Inc, 1983

[CdT en procés d'incorporació]

Code: 262,005 Auteur: Jaufre Rudel de Blaja Genre: Vers Numero: 4

Qan lo rius de la fontana

I	1	Qan lo rius de la fontana
		s’esclarzis si cum far sol,
		e par la flors aiglentina,
		e·l rossignoletz el ram
	5	volv e refraing et aplana
		son doutz chantar et afina,
		dreitz es q’ieu lo mieu refraigna.
II		Amors de terra loindana,
		per vos totz lo cors mi dol;
	10	e non puosc trobar meizina
		si non vau al sieu reclam,
		ab atraich d’amor doussana,
		dinz vergier o sotz cortina
		ab desirada compaigna.
III	15	Pois del tot m’en faill aizina,
		no·m meravill s’ieu m’aflam,
		car anc genser Crestiana
		non fo, que Dieus non la vol,
		Juzeva ni Sarrazina;
	20	et es ben paisutz de manna
		qui ren de s’amor gazaigna.
IV		De desir mos cors non fina
		vas cella ren q’ieu plus am;
		e cre que volers m’engana
	25	si cobezeza la·m tol;
		que plus es pongens q’espina
		la dolors que ab joi sana,
		don ja non vuoill c’om m’en plaigna.
V		Senes breu de pargamina
	30	tramet lo vers que chantam
		plan et en lenga romana
		a·N Hugon Brun per Fillol;
		bon m’es car gens Peitavina,
		de Beiriu et de Guianna
	35	s’esgau per lui, e Bretaigna.