Stronski, Stanislaw. Le troubadour Folquet de Marseille. Genève: Slatkine Reprints, 1968

[CdT en procés d'incorporació]

Code: 155,023 Auteur: Folquet de Marseilla Genre: Canso Numero: III

Tan mou de corteza razo

I	1	Tan mou de corteza razo
		mos chantars qu’ieu no·i puesc faillir ;
		enans hi dei miels avenir
		qu’anc mais no fis ; e sabetz quo ?
	5	que l’emperairitz m’en somo ;
		e plagra·m fort qu’ieu m’en gequis,
		s’il m’o sofris ;
		mas, car ylh es sim’ e razis
		d’enssenhamen,
	10	no s’eschai qu’al sieu mandamen
		sia mos sabers flax ni lens,
		anz tanh que·s doble mos engens.
II		E s’anc parliei e ma chanso
		de lauzengiers, cui Dieus azir,
	15	aissi los vuelh del tot maldir,
		e la Dieus noqua lor perdo
		quar an dig so qu’anc vers no fo,
		per que sella cui obedis
		me relinquis
	20	e cuja qu’aillors ai’ assis
		mon pessamen ;
		be muer doncx per gran fallimen
		s’ieu pert so qu’ieu am finamens
		per so qu’il dizo qu’es niens.
III	25	Mas ges per tal no m’abando,
		qu’ieu ai anc sempres auzit dir
		que messonja no·s pot cobrir
		que no mueira qualque sazo ;
		e pos dregz vens fals’ ocaizo,
	30	encar er proat e devis
		com ie·l sui fis ;
		qu’aissi·l sui subjetz et aclis
		de bon talen
		qu’en lieis amar an pres conten
	35	mos ferms Coratges e mos Sens,
		c’usquecx cuj’ amar plus fortmens.
IV		E si Merces no m’i ten pro
		que farai ? poirai m’en partir ?
		ieu no, qu’après ai a murir,
	40	de guisa que m’er sobrebo :
		qu’ins e·l cor remir sa faisso,
		e remiran — et ieu languis
		quar ela·m dis
		que no·m dara so qu’ieu l’ai quis
	45	tan lonjamon —
		e ges per aissono m’alen,
		ans dobl’ ades mos pessamens —
		e muer aissi mescladamens.
V		Amarai la doncs a lairo,
	50	pos vei que no·m denha sofrir ?
		oc ieu, qu’ins e·l cor la remir
		e sai qu’a far m’er, vuelh’ o no ;
		que·l Cor ten lo Cors em preiso
		et a·l si destreg e conquis
	55	que no m’es vis
		que·lh des poder que s’en partis ;
		enans aten
		quom la puesca vencer suffren,
		ar loncx sufrirs e merces vens
	60	lai on no val forsa ni giens.
T		N’Aziman, mout m’estara gen
		s’ieu muer per midons doussamens,
		pos a murir m’er eissamens.