Stronski, Stanislaw. Le troubadour Folquet de Marseille. Genève: Slatkine Reprints, 1968

[CdT en procés d'incorporació]

Code: 155,006 Auteur: Folquet de Marseilla Genre: Canso Numero: VI

Chantan volgra mon fin cor descobrir

I	1	Chantan volgra mon fin cor descobrir
		lai on m’agr’ ops que fos saubutz mos vers,
		mas per dreich gaug m’es faillitz mos sabers,
		per qu’ai paor que no·i puosc’ avenir :
	5	c’us novels jois en cui ai m’esperansa
		vol que mos chans sia per leis enders
		e car li platz q’ie u enans sa lauzor
		e mon chantar, don ai gaug e paor,
		car s os pretz vol trop savi lauzador.
II	10	Per que no·m par qu’ieu pogues devezir
		son cortes pretz que tant aut es aders
		c’om no·n ditz ver que non semble plazers,
		e trob aitant en lieis de ben a dir
		que sofraitos m’en fai trop d’aondansa ;
	15	per qu’ieu m’en lais, que no·m ditz mos espers
		c’om ja pogues retraire sa valor,
		qar de bon pretz a triat lo meillor
		e dels amans lo plus fin amador.
III		Car anc no’ill dis — tant tem vas lei faillir —
	20	com s’es en leis aturatz mos volers ;
		mas derenan no m’o tolra temers,
		qu’eu sai qe·l fuocs s’abrasa per cobrir,
		e·l dieus d’amor a·m nafrat de tal lansa
		don no·m ten pro sojornars ni jazers,
	25	anz desampar, per midonz cui ador,
		tal que m’a fait gran ben e gran honor,
		mas ben deu hom camjar bon per meillor.
IV		Pero ren als no·n ai mas lo desir.
		Non ai doncs pro ? Mout es grans mos poders
	30	si neis d’aitan m’en es donatz lezers !
		E doncs per que·m vuoill de plus enardir,
		car sos bels ris ab sa gaia semblansa
		mi pais mos huoills, tant m’agrada·l vezers ?
		Mas un conort n’ai qe·m mou de folor :
	35	q’ades m’es vis qe·m vuoilla dar s’amor
		qan volv vas mi sos huoills plens de doussor.
V		E doncs, dompna, pos mais non puosc sofrir
		lo mal q’ieu trac per vos matis e sers,
		merce n’aiatz ! ; qu’e·l mon non a avers
	40	que, senes vos, mi pogues enriquir ;
		e car no·us vei, soven ai gran doptansa
		que no·us mi fass’ oblidar non-calers ;
		mas ieu que sent la pen’ e la dolor
		no·us oblit jes, anz i tenc nuoich e jor
	45	los huoills del cor si que no·ls vir aillor.
		. . . . . . . . . . . . . . . . . . . . . . . . . . . . . . . .
		. . . . . . . . . . . . . . . . . . . . . . . . . . . . . . . .
		. . . . . . . . . . . . . . . . . . . . . . . . . . . . . . . .