Stronski, Stanislaw. Le troubadour Folquet de Marseille. Genève: Slatkine Reprints, 1968

[CdT en procés d'incorporació]

Code: 155,003 Auteur: Folquet de Marseilla Genre: Canso Numero: X

A ! quan gen vens et ab quan pauc d’afan

I	1	A ! quan gen vens et ab quan pauc d’afan
		aissel qui·s laissa venser ab merce !
		quar enaissi vens hom autrui e se
		et a vencut doas vetz senes dan ;
	5	mas vos, Amors, non o faitz jes aissi,
		c’anc jorn merces ab vos no·m poc valer,
		ans m’avetz tan mostrat vostre poder
		qu’era no·us ai ni vos non avetz mi.
II		Per que·m par fols qui non sap retener
	10	so que conquer, qu’ieu prez ben atrestan
		qui so rete quez a conquist denan
		per son esforz com fatz lo conquerer ;
		mas aisi·m retengratz quo·l fols rete
		l’esparvier fer, quan tem que se desli,
	15	que l’estrenh tan e·l poynh tro que l’auci ;
		mas, pus estortz vos sui, viure puosc be.
III		Tot so que val pot nozer atressi,
		donc, s’ie·us tinc pro, be us poirai dan tener,
		et er merces s’ab eis vostre saber
	20	que m’avez dat — don anc jorn non jauzi
		vos mou tenson ni·us dic mal en chantan !
		mas non er fach, que chausimens m’en te :
		anceis voill mais mon dan sofrir jasse
		que·ls vostres tortz adreitures claman.
IV	25	On trobaretz mais tan de bona fe ?
		c’anc mais nuils hom si mezeis no trai
		son escien, si com ieu que·us servi
		tan longamen, qu’anc non jauzi de re ;
		ar quier Merce so faria parer,
	30	quar qui trop vai servizi repropchan
		ben fai semblan que·l guizerdon deman ;
		mas la de mi non cujetz que·l n’esper,
V		E qui·l bon rei Richart qui vol qu’ieu chan
		blasmet per so quar non passet dese,
	35	ar l’en desmen si que chascus o ve ;
		qu’areire·s trais per miels salhir enan :
		qu’el era coms, ar es rix reis ses fi,
		quar bon socors fai Dieus a bon voler ;
		e s’ie·n dis ben al crozar, ieu dis ver,
	40	et ar veim o, per qu’adonc no menti.
T		Ja N’Azimans ni·N Tostemps non creiran
		qu’ieu contr’ Amor aia virat mon fre ;
		mas eu tenc be per proat so qu’om ve
		e sabr’ o meills chascus des er enan.