Stronski, Stanislaw. Le troubadour Folquet de Marseille. Genève: Slatkine Reprints, 1968

[CdT en procés d'incorporació]

Code: 155,011 Auteur: Folquet de Marseilla Genre: Canso Numero: XIV

Ja no·is cug hom qu’ieu camje mas chansos

I	1	Ja no·is cug hom qu’ieu camje mas chansos
		pos no·s camja mos cor ni ma razos :
		car, s’ieu·m jauzis d’Amor, ieu m’en lauzera,
		mas, qu’ie’n mentis no·m seria nuls pros ;
	5	qu’atressi·m te quom se sol en balansa :
		dezesperat ab alques d’esperansa,
		pero no·m vol del tot laissar murir
		per so que·m puesca plus soven aucir.
II		Mas er vei so qu’anc no cugei que fos :
	10	qu’ieu sui tornatz de mi mezeis gilos
		contra midons qu’ieu no la corteiera ;
		mas tot cosselh qu’az amor sia bos
		n’ai assaiat e pos re no m’enansa,
		tot li farai de desamar semblansa ;
	15	ailas ! qu’ai dig ? ja·m cujav’ ieu cubrir
		e doncs hueimais la sap tot mon albir.
III		Dona, ben vei que no·m val ocaizos.
		qu’ Amors no vol qu’ieu ja·n sia ginhos ;
		merce vos clam, que no m’en lais enquera,
	20	tant es mos cors de vostr’ amor cochos ;
		volcsetz, si’us platz, complir la devinansa,
		qu’om ditz qu’ieu ai d’autr’ amor benanansa,
		e que·us pogues cobertamen jauzir,
		e·l bruitz vengues de lai on sol venir.
IV	25	Don’ esperans’ e paor ai de vos,
		qu’ar m’en conort et ara·n sui duptos,
		pero·l paors tem qu’o apoderera ;
		mas un conort ai d’Amor a sazos :
		qu’ap tal poder mi mostra sa coindansa
	30	qu’ anc plus no·m poc donar de malestansa ;
		e fai esfortz qui pot esaems sofrir
		ir’ e poder de sel qui·l vol delir.
V		Mas ben conosc que grans meillurazos
		es de tort fag quant hom n’es oblidos,
	35	jamais Amors a tal tort no·m menera
		s’ieu la pogues tornar dezamoros ;
		pero, leus cor tol manhta malanansa,
		e·n vei fallir mantz, per qu’ieu n’ai duptansa,
		qu’e·l falhimen d’autrui tanh qu’om se mir
	40	per so qu’om gart se mezeis de falhir.
T1		Ai ! Na Ponsa qual esfortz fatz per vos
		car era chant e n’ai null’ alegransa
		que·lh mortz de mo senhor me desenansa,
		car vos sabez qu’el sabia chauzir
	45	cui devi’ hom honrar ni enantir,
T2		A N’Aziman ten, Palais, e t’enansa
		et a·N Tostemps, e di lur ses duptansa
		que totz aitals sui quom ieu eis m’albir
		e no m’en pot nuls fatz enfadesir.