Stronski, Stanislaw. Le troubadour Folquet de Marseille. Genève: Slatkine Reprints, 1968

[CdT en procés d'incorporació]

Code: 155,020 Auteur: Folquet de Marseilla Genre: Planh Numero: XVII

Si cum cel q’es tan greujatz

I	1	Si cum cel q’es tan greujatz
		del mal que non sen dolor,
		non sen ira ni tristor
		de guisa·m sui oblidatz ;
	5	car tant sobrepoia·l dans
		que mos cors no·l pot penssar
		ni nuills hom tro al proar
		no pot saber cum s’es grans
		d’En Barral, lo mieu bon seignor ;
	10	per que, s’er chant o ri o plor,
		no m’o pretz plus cum fer’ enans.
II		Qu’ie·m pens si sui enchantatz
		o sui cazutz en error
		qan no trop sa gran valor ;
	15	c’aissi nos teni’ honratz
		q’eissamens cum l’azimans
		tira·l fer e·l fai levar
		fazi’ el mains cors dreissar
		vas pretz, forssatz e pesans ;
	20	e qui pretz e gaug et honor,
		sen, larguesa, astr’ e ricor
		nos a tout, pauc vol nostr’ enans.
III		Ai ! qans n’a deseretatz
		q’eron tuich ric en s’amor,
	25	e qant en moriro·l jor
		q’el fo mortz e soterratz !
		q’en un sol non vitz mortz tans ;
		neis qui l’auzion nomnar
		n’entendion achaptar,
	30	tant era sos pretz prezans ;
		qu’aissi saup sonom far aussor,
		de pauc gran e de gran major,
		tro no·l poc enclaure garans.
IV		Ai ! seigner doutz e privatz
	35	cum puosc dir vostra lauzor ?
		q’a lei de riu sorzedor
		qu’ieis mais on plus es voiatz
		creis vostre laus en pensans
		e·i trob ades mais que far,
	40	e sembla·l vostre donar
		don vos creissia·l talans
		on mais venion queridor ;
		mas Dieus, cum a bon donador,
		vos donav’ ades mil aitans.
V	45	Et er, qan foz plus poiatz,
		faillitz a guisa de flor
		que, qand hom la ve genssor,
		adoncs ill chai plus viatz ;
		mas Dieus nos mostr’ ab semblans
	50	que sol lui devem amar
		e·l chaitiu segl’ azirar
		on pass’ om com vianans,
		qu’autre pretz torn’ en desonor
		e totz autre sens en folor
	55	mas de cels que fan sos comans.
VI		Bel Seigner Dieus, cui non platz
		mortz de negun pechador,
		anz per aucire la lor
		sofritz vos la vostr’ en patz,
	60	faitz lo lai viur’ ab los sans,
		pos sai no·l volguetz laissar !
		E deignatz l’en vos preiar,
		Verges, que preiatz per mans
		vostre Fill, per q’el los socor,
	65	q’ esperans’ an tuich li meillor
		e·ls vostres cars precs merceians.
T		Seigner, meravillas grans !
		car eu de vos puosc chantar
		ar qan mieils degra plorar ;
	70	pero tant plor en penssans
		per qe ben leu maint trobador
		diran de vos mais de lauzor
		quez ieu qu’en degra dir mil tans.