Javascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.com

* Introduction

* Présentation
* Appareil critique
* Traductions
* Images

Stronski, Stanislaw. Le troubadour Folquet de Marseille. Genève: Slatkine Reprints, 1968

[CdT en procés d'incorporació]

Code: 155,013 Auteur: Folquet de Marseilla Genre: Canso Numero: XXI

Meravil me cum pot nuls hom chantar

I 1 Meravil me cum pot nuls hom chantar
    si cum ieu fas per lieys que·m fay doler,
    qu’en mas chansos no puesc aparellar
    dos motz qu’al terz no·m lays marritz chazer,
  5 quar no suy lay on estai sos cors gens,
                doutz e plazens,
            que m’ auci deziran
    e no pot far murir tan fin aman.
     
II   E quar non puesc nulla ren tant amar,
  10 ges, s’a lei platz, non deu ma mort voler,
    qu’anc, pus la vi, non puec d’alre pensar
    mas cum pogues dir e far son plazer ;
    et es ben dregz, qu’al laus dels conoissens
                es plus valens ;
  15         per qu’ieu n’am mais l’afan
    de lieys servir que d’autr’ aver joi gran.
     
III   Las ! ieu non l’aus mon messatg’ enviar,
    ni tan d’ardit non ay qu’ieu l’an vezer ;
    e non o lays mas quar vuelh far cuydar
  20 als fals devis qu’alhors ai mon esper ;
    pero·l dezirs m’es ades pus cozens
                e·l pensamens
            quar ieu no·l sui denan
    mas jonhtas, clis, per far tot son coman.
     
IV 25 Lo mals qu’ie·n trac no·m pot desconortar
    tan la fai pretz sobre totas valer,
    ni negus hom no la pot trop lauzar ;
    Dieus don qu’ilh vuelh’ humilitat aver,
    si cum en lieys es proez’ e jovens,
  30             beutatz e sens,
            qu’anc dona non ac tan ;
    doncs, cal tort n’ai s’ieu nuill’ autra no blan ?
     
V   Belha dompna, tan vos am e·us tenc car
    que manhtas vetz lo jorn no·m puesc tener
  35 qu’az una part non an totz sols plorar,
    si qu’ieu no·m puesc d’una pessa mover,
    tal paor ai no·m valla chauzimens ;
                quar plus mi vens
            vostr’ amors sospiran
  40 qu’ieu no sai dir ni retrair’ en chantan.
     
T               Qu’ie·us sui guirens
            plus vos am ses enjan
    no fetz Yzeutz son bon amic Tristan .

 

 

Institut d'Estudis Catalans. Carrer del Carme 47. 08001 Barcelona.
Telèfon +34 932 701 620. Fax +34 932 701 180. informacio@iec.cat - Informació legal

UAI