Stronski, Stanislaw. Le troubadour Folquet de Marseille. Genève: Slatkine Reprints, 1968

[CdT en procés d'incorporació]

Code: 370,009 Auteur: Perdigon Genre: Canso Numero: XXVI

Los mals d’Amor ai ieu ben totz apres

I	1	Los mals d’Amor ai ieu ben totz apres
		mas anc los bes no puec un jorn saber,
		e si no fos quar ieu ieu ai bon esper
		ieu cujera que no·n i agues ges ;
	5	et agra dreg qu’eu fos dezesperatz
		tant ai amat et anc no fui amatz ;
		pero, si·l bes es tan dous e plazens
		quom es lo mals engoissos e cozens,
		ans vuel murir qu’eu ancar non l’atenda.
II	10	C’atressi cre qu’a morir m’avengues
		o viuria tostemps ses mon plazer ;
		doncs, no m’es miels que mueir’ en bon esper
		qu’aia vida que ja pro no·m tengues ?
		qu’assatz es mortz totz hom que viu iratz,
	15	a cui non es jois ni plazers donatz :
		eu sui ben sel que negus jauzimens
		no·m pot dar joi per qu’ieu sia jauzens
		tro qu’a midons plassa qu’a merce·m prenda.
III		E s’ieu per so sui forfaitz ni mespres
	20	quar sol vos aus dezirar ni voler
		jes per aissono·m tuelh de bon esper,
		que major tort perdona be Merces ;
		pero, si·l tortz mi fos a dreg jutgatz
		eu no cuger’ esser tan encolpatz ;
	25	mas vencutz es tot so que forsa vens,
		que negus dregz no·i pot esser guirens ;
		per que m’es ops que Merces m’i defenda.
IV		La grans beutatz e·il valors qu’en leis es
		e totz bos aips que domna puesc’ aver
	30	mi fan estar ades en hon esper,
		car sonon cre que jes esser pogues
		que lai on es totz autres bes pausatz
		que no·i sia messa humilitatz ;
		so·m fai sofrir ma dolor bonamens
	35	qu’ Humilitatz, Merces e Chauzimens
		m’en pot valer sol qu’a midons s’enprenda.
V		Eu et Amors em d’aital guiz’ empres
		qu’ora ni jorn, nueg ni mati ni ser,
		no·s part de me ni eu de bon esper ;
	40	que mort m’agra la dolors, tan grans es,
		s’en bon esper no·m fos asseguratz ;
		pero mos mals no·n es en re mermatz,
		que loncs espers m’aura fag longamens
		estar mariz et en granz pensamens,
	45	et ancara tem que plus car m’o venda.
T1		Mas s’ieu un jorn fos amics apellatz
		de tan bon cor quom ieu li·m sui donatz,
		a la bella don no·is part mos talens,
		anc tant Amors no·m destreis malamens
	50	qu’en eys lo jorn no·m agues fag esmenda.
T2		[Vas N’Aziman vuelh, chanso, que tengatz
		et a·N Tostems, car lur serez plazens,
		mas no tenhatz entre las avols gens,
		car qui val mais crei que mielhs vos entenda.]